A Asociación de Periodistas de Información Ambiental (APIA) presenta unha guía práctica que proporciona fontes bibliográficas, datos sobre as principais ONG ecoloxistas e movementos sociais, un decálogo de boas prácticas e recomendacións para que os xornalistas realicen cada vez máis entrevistas nas que o medio ambiente sexa o tema transversal, co obxectivo de que se divulguen en varias seccións dos diferentes medios de comunicación de proximidade.

Fonte: La Vanguardia

A CE comprométese a estudar fórmulas para integrar o galego, o catalán e o éuscaro nesta plataforma destinada a axudar aos participantes do programa Erasmus+ e o Corpo Europeo de Solidariedade a mellorar os seus coñecementos dunha lingua.

Fonte: Galicia Press

O INE fixo públicos recentemente os datos da Enquisa de Características Esenciais da Poboación e Vivendas correspondentes ao ano 2021 que sinalan que arredor de 13 millóns de persoas entenden o catalán en todo o Estado español, onde, tamén apuntan, é a segunda lingua inicial e que a saben falar 11,5 millóns de persoas.

Fonte: Generalitat de Catalunya

Despois de resolver unha solicitude de amparo dunha empresa que reclamaba ter recibido unha resolución en catalán, o Tribunal avala o uso das linguas cooficiais sempre que non se produza unha indefensión constitucionalmente relevante derivada da súa utilización.

Fonte: RBD Noticias

Xa se pode utilizar a aplicación líder en detectar e acceder a redes wifi por todo o mundo en catalán, unha acción promovida pola Plataforma per la Llengua e que converte a lingua catalá no 19.º idioma no que se ofrece WiFi Map.

Fonte: El Nacional.cat

Os Gobernos vasco e navarro e a Oficina Pública da Lingua Vasca presentaron a marca Euskaraz barra-barra que identifica espazos para falar en éuscaro no comercio e a hostalería. Trátase dun proxecto que se irá estendendo a todos os territorios onde se fala esta lingua e que inicialmente se restrinxirá ao ámbito privado.

Fonte: Gobierno Vasco

Unha investigación da Universidade de Alacant analizou o uso das diferentes linguas na comunicación dixital en contornos multilingües, poñendo o foco nos contidos de webs e de redes sociais de 88 universidades do Espazo Europeo de Educación Superior. Entre as conclusións destaca a escasa presenza de linguas minoritarias, agás nas universidades españolas, e a baixa implantación do inglés.

Fonte: Alpha Galileo

A Real Academia Española e o Instituto de Estudos Cataláns, a Real Academia Galega e a Real Academia da Lingua Vasca celebraron un encontro en  Cádiz no que se abordou a necesidade de mellorar a colaboración e a comunicación como vías para promover a diversidade lingüística e fortalecer o plurilingüismo en España.

Fonte: La Vanguardia

Os gobernos de Baleares, Valencia, Cataluña, País Vasco, Navarra e Galicia, membros da comisión de seguimento do Protocolo de colaboración en materia de política lingüística, acordaron nunha reunión mantida en Palma enviarlles un escrito ás principais plataformas audiovisuais para trasladarlles a importancia dunha ampla oferta de contidos nas linguas oficiais diferentes ao castelán.

Fonte: Galicia Confidencial

Plataforma per la Llengua recibiu 56 queixas por discriminación lingüística en universidades de Cataluña, Valencia e Baleares que se reparten así: 24 porque unha materia que se tiña que impartir en catalán finalmente se impartiu noutra lingua; outras 24 pola falta de oferta de materias en catalán; e oito por vulneración doutros dereitos lingüísticos.

Fonte: Última Hora