Catalunya Ràdio organizou unha mesa redonda sobre lingua na que participaron representantes dos gobernos de Galicia, País Vasco, Baleares, Comunidade Valenciana e Cataluña. As tres últimas apostan por formar unha fronte común para fomentar o uso do catalán, mentres que as dúas primeiras celebran a consolidación do galego e o éuscaro, respectivamente.  

Fonte: Valencia Plaza

Plataforma per la Llengua editou unha guía en inglés, francés e alemán para dar a coñecer a realidade lingüística do catalán. A publicación enviarase a máis de 240 puntos de todo o mundo, entre os que figuran universidades, delegacións catalás no estranxeiro ou entidades internacionais.

Fonte: Plataforma per la Llengua

O Instituto Cervantes comprometeuse coa promoción das linguas cooficiais de España, co avance na dixitalización e coa súa implantación en novos países, segundo avanzou o seu director nunha rolda de prensa na que fixo alusión aos retos desta institución.  

Fonte: Instituto Cervantes

O Senado votou maioritariamente a prol de incluír unha emenda nos Orzamentos Xerais do Estado de 2022 relativa á promoción e á difusión das linguas protexidas pola Carta Europea das Linguas Rexionais ou Minoritarias por un importe de 1,6 millóns de euros.

Fonte: Galicia Confidencial

Este acordo ten como obxectivos fomentar un uso correcto do español na intelixencia artificial e garantir a unidade desta lingua con todas as súas variedades. A iniciativa enmárcase no proxecto LEIA que naceu para normativizar o bo uso do idioma nas máquinas.

Fonte: Real Academia Española

A Eurorrexión Pireneos Mediterránea creou un grupo de linguas para impulsar o catalán e o occitano, que son as linguas propias dos territorios que engloba, isto é, Cataluña, Baleares e Occitania. Este grupo porá en marcha dous proxectos piloto: un para fomentar o seu uso entre a mocidade nas redes sociais e outro para intercambiar experiencias no ensino para adultos.  

Fonte: Generalitat de Catalunya

A iniciativa Arnas Dezagun ten como obxectivo denunciar a dispersión do alumnado falante de éuscaro, así como pedirlles ás Administracións e aos centros educativos que se garantan espazos vitais cómodos para comunicarse nesta lingua.  

Fonte: Naiz

Plataformas audiovisuais como Netflix, HBO ou Amazon Prime Video deberán ofrecer un 6 % dos seus contidos en galego, catalán ou éuscaro. Así se recollerá na nova lei audiovisual que prepara o Goberno español, que ademais tamén obrigará a incorporar subtítulos nestas linguas sempre que sexa posible.

Fonte: El Periódico

Cataluña, Baleares e a Comunidade Valenciana crean unha canle dixital para afianzar os lazos lingüísticos e culturais que as unen. Bon Dia TV convértese así nunha plataforma web para compartir contidos audiovisuais en lingua catalá.

Fonte: El Diario

O ministro de Cultura e Deporte anunciou a posta en marcha de medidas na futura lei do audiovisual co obxectivo de incrementar a presenza do galego, o catalán e o éuscaro en plataformas dixitais como Netflix, HBO ou Filmin.

Fonte: El Diario