España
Entréganse os premios Lingua de signos catalá 2023
Estes galardóns recoñecen o labor de personalidades, entidades e proxectos que traballan para fomentar a lingua de signos catalá (LSC). No acto de entrega dos premios presentouse a adaptación do Marco Común Europeo de Referencia para a Aprendizaxe de Linguas á LSC.
Fonte: Generalitat de Catalunya
A Deputación Foral de Biscaia convoca axudas a entidades que fomenten o éuscaro
Esta convocatoria de subvencións está dirixida a entidades sen ánimo de lucro e que impulsen actividades de fomento do éuscaro en diferentes ámbitos sociais, como lecer, deporte, contidos dixitais, contorno laboral etc.
Fonte: Diputación Foral de Bizkaia
O Goberno de Navarra considerará a valoración do éuscaro como mérito na zona mixta para o acceso á Administración
O Goberno navarro tomará en consideración o proxecto de decreto que regula a valoración de méritos no acceso a postos de traballo na Administración foral, entre eles, o coñecemento do éuscaro cando estea relacionado co contido do posto.
Fonte: Gobierno de Navarra
Segundo un informe, o catalán úsase máis nas pemes que nas grandes empresas
El uso habitual del catalán en las pymes é o título dun informe da patronal Pimec que, entre as súas conclusións, sinala que o uso do catalán nas comunicacións coa clientela se incrementou un 17,1 % na última década.
Fonte: La Vanguardia
O Goberno vasco celebra un acto de recoñecemento do uso do éuscaro de entidades públicas e privadas
Neste acto, celebrado en Bilbao, recoñecéronse os avances de entidades públicas e privadas en materia de xestión e desenvolvemento do éuscaro. Así, ademais dos certificados Bikain, entregáronse outros distintivos como os diplomas Harrobi.
Fonte: Gobierno Vasco
Ponse en marcha a terceira edición de ERA Eskola, unha iniciativa de formación en éuscaro para as familias
Euskarabidea e varias entidades locais de Navarra puxeron en marcha a Escola de Nais e Pais para familias cuxas fillas e fillos aprenden éuscaro no centro escolar. Así, a través de sesións en liña, reciben información e recursos sobre temas que lles poden resultar de interese.
Fonte: Gobierno de Navarra
O Goberno de Cataluña e o Consello da Avogacía Catalá renovan o seu convenio para o fomento do catalán na quenda de oficio
A renovación deste convenio, polo que o Consello da Avogacía Catalá recibirá 350 578 euros, suporá a execución dun programa de fomento do uso do catalán nas actuacións procesuais de asistencia xurídica gratuíta para o ano 2024.
Fonte: Generalitat de Catalunya
As vendas de libro en catalán medran un 12 %
O Gremio de Editores de Cataluña salientou o incremento das vendas do libro en catalán, un 12 % respecto ao ano anterior, que supoñen uns 140 millóns de euros no sector do libro en Cataluña.
Fonte: Ara
Publícase en liña a terminoloxía catalá das barreiras no comercio internacional
Terminologia de les barreres al comerç internacional, publicada en liña polo TERMCAT e ACCIÓ, inclúe 200 termos en catalán coas súas equivalencias en castelán, francés e inglés, así como definicións e notas complementarias.
Fonte: Generalitat de Catalunya
O Goberno vasco recibe unha delegación australiana que quere coñecer o seu sistema de tradución
Representantes do Goberno de Australia visitan o País Vasco do 11 ao 15 de decembro para coñecer IZO, o Sistema Oficial de Tradutores para a tradución e a interpretación do éuscaro e ao éuscaro da Administración.
Fonte: Gobierno Vasco
Boletín
Subscríbase ao boletín
