España
A Deputación de Biscaia apoia un proxecto para fomentar o uso do éuscaro no ámbito deportivo
O proxecto «Federazioetako Euskara-Gaitasuna», impulsado pola Asociación de Federacións Deportivas de Biscaia (ASFEDEBI), recibirá da Deputación unha axuda de 15 000 euros para a súa execución en 2023.
Fonte: Bizkaiko Foru Aldundia
A poboación vasca contará con materiais para obter o permiso de conducir en éuscaro
O Goberno vasco e a Federación de Autoescolas de Euskadi presentaron o material para poder obter os permisos de conducir en éuscaro: A1-A2 de ciclomotor e B de automóbiles.
Fonte: Gobierno Vasco
Máis de cen traballos sobre o éuscaro preséntanse ao concurso de creatividade audiovisual Arnasetik
O concurso de creatividade audiovisual Arnasetik recibiu un total de 112 traballos sobre temas relacionados co éuscaro elaborados por mozas e mozos de entre 10 e 16 anos.
Fonte: Gobierno Vasco
O Concello de Altea organiza un ciclo de cine en valenciano
Ao longo dos meses de decembro e xaneiro proxectaranse de xeito gratuíto cinco películas no marco do ciclo de cine familiar en valenciano.
Fonte: El Periòdic
A décima edición do Viquimarató de la Llengua Catalana dedícase ao vocabulario deportivo
Do 23 ao 29 de novembro celébrase o X Viquimarató de la Llengua Catalana, que estará dedicado ao vocabulario deportivo e no que poderán participar persoas e entidades dos territorios de fala catalá.
Fonte: Generalitat de Catalunya
Máis da metade do alumnado da Universidade do País Vasco está matriculado en éuscaro este curso
A Universidade do País Vasco presentou un informe sobre a situación e a evolución do éuscaro na institución. Neste estudo conclúese que o 54 % do alumnado está matriculado en éuscaro e o 66 % do persoal docente e investigador é bilingüe.
Fonte: Onda Vasca
Cinco entidades financeiras presentan as súas iniciativas para promover o uso do éuscaro
Bankoa-Abanca, CaixaBank, Rural Kutxa, Kutxabank e Laboral Kutxa anunciaron as iniciativas postas en marcha para promover o uso do éuscaro nas entidades financeiras e garantir os dereitos lingüísticos da súa clientela.
Fonte: Gobierno Vasco
A Generalitat de Cataluña incorporará un asesor para reforzar a aprendizaxe do aranés nas escolas de Aran
A conselleira de Educación anunciou a creación dunha praza de asesor en lingua, interculturalidade e cohesión social (LIC) para reforzar a aprendizaxe do aranés nos centros educativos de Aran.
Fonte: La Vanguardia
A Academia Valenciana da Lingua e o Concello de Vinaròs continuarán impulsando proxectos para a promoción do valenciano
Ambas as institucións mantiveron unha reunión de seguimento do convenio de colaboración, en vigor dende 2008, para a posta en marcha de actuacións de promoción do valenciano.
Fonte: Ajuntament de Vinaròs
A Generalitat de Cataluña e a Asociación de Publicacións Periódicas en Catalán repartirán revistas en lingua catalá a centros sanitarios
No marco da campaña «T’agradarà llegir en català» distribuiranse revistas en catalán nas salas de espera de centros sanitarios privados de Cataluña co obxectivo de fomentar a dispoñibilidade de publicacións e de lecturas sobre diferentes temáticas nesta lingua.
Fonte: Generalitat de Catalunya
Boletín
Subscríbase ao boletín
