España
A Deputación de Badaxoz contribúe ao impulso do romaní mediante subvencións a diferentes proxectos
Mediante as axudas a asociacións e entidades sen ánimo de lucro localizadas na provincia de Badaxoz, a Deputación Provincial contribúe economicamente ao impulso do romaní co desenvolvemento de diferentes proxectos.
Fonte: InfoProvincia
Increméntase o número de persoas que obteñen o certificado de nivel C2 de catalán
Case oito de cada dez persoas que se presentaron aos exames para obter o certificado C2 de catalán aprobaron, 6,5 puntos máis que no ano 2021. Previamente xa se incrementaran as inscricións, que se multiplicaron por tres, así como a proporción de presentados.
Fonte: El Periódico
O Concello de Barcelona impulsa unha serie de medidas para fomentar o uso do catalán na cidade
Ante a diminución do uso do catalán que constatan varios estudos, principalmente, entre a xente nova, o goberno local presentou unha serie de propostas para impulsar o uso desta lingua na cidade, distribuídas por ámbitos: ensino; mocidade, lecer e deporte; cultura, ciencia e universidades; empresa, comercio e turismo; sanidade, acollida e arraigo; e Administración.
Fonte: Ajuntament de Barcelona
O Goberno de Asturias e o Concello de Carreño organizan a primeira edición do Reguerada Fest, unha iniciativa para impulsar o uso do asturiano
Reguerada Fest nace como punto de encontro da cultura e o mundo empresarial en asturiano. A programación inclúe actividades como recitais, obradoiros, charlas, exposicións e concertos, todo co asturiano como lingua vehicular.
Fonte: El Comercio
O Concello de León e a Asociación Faceira organizan un curso de lingua e cultura leonesas
Este curso de iniciación á lingua e cultura leonesas impartirase en León a partir do 11 de novembro e terá unha duración de 50 horas. Ademais de temas estritamente lingüísticos, trataranse outros aspectos como toponimia, historia, literatura, música etc.
Fonte: León Noticias
O Ministerio de Cultura destina 290 000 euros á promoción do aragonés e do catalán de Aragón
O Goberno de Aragón recibiu esta cantidade coa que se financiarán 14 proxectos, entre os que se atopan a dobraxe ao aragonés dunha serie infantil, a difusión da realidade trilingüe de Aragón, a realización de audiovisuais, a terceira edición da Feira Agora x l’aragonés etc.
Fonte: Aragón Noticias
Máis da metade de xuíces en prácticas desexaría aprender catalán, galego ou éuscaro
Segundo un estudo do Consello Xeral do Poder Xudicial, o 53 % dos 161 xuíces en prácticas mostra interese en recibir clases dalgunha lingua cooficial, fronte ao 37,42 % que non está disposto. A maioría deles, 67, inclínase polo catalán, 35 polo galego, 23 polo valenciano e 12 polo éuscaro.
Fonte: The Objective
O Concello de Olivenza e o Instituto Camões cooperarán en materia lingua e cultura portuguesas
O alcalde de Olivenza reuniuse con representantes do Instituto Camões co obxectivo de achegar posturas sobre cooperación entre ambas as institucións en materia lingüística.
Fonte: InfoProvincia
O Goberno do Principado promove a poesía en asturiano cun ciclo de encontros literarios
O ciclo «Quod Erat Demonstrandum (QED)» ten como obxectivo promocionar e darlles voz aos poetas que escriben en asturiano. Para iso, organizaranse encontros entre autores do Principado con outros de fóra de Asturias, que se traducirán a esta lingua para a ocasión.
Fonte: Astur News
Segundo as estatísticas de Eustat, o 60 % dos habitantes do País Vasco ten coñecementos de éuscaro
Seis de cada dez residentes en Euskadi teñen algún coñecemento de éuscaro e a porcentaxe de euscaldúns alcanza o 43 %, o que significa que se incrementou seis puntos na última década. Por territorios, Guipúscoa mantense como o territorio cunha maior porcentaxe de poboación euscaldún, seguido de Biscaia e, por último, Áraba.
Fonte: El Diario
Boletín
Subscríbase ao boletín
