España
Créase un “Tinder en éuscaro” co obxectivo de formar unha comunidade nesta lingua para coñecer xente
O espazo EginTril ten como obxectivo crear unha comunidade integramente en éuscaro, un 'Tinder vasco' pero que, a diferenza desta app de citas, non será unha a aplicación móbil, senón un Space de Twitter.
Fonte: El Diario
Preséntase no Parlamento vasco a Axenda Estratéxica do Éuscaro 2021-2024
A Axenda Estratéxica do Éuscaro 2021-2024 é o documento que define as liñas de traballo e os obxectivos estratéxicos da política lingüística do Goberno vasco para esta lexislatura. Con este proxecto preténdese seguir incrementando o coñecemento e o uso desta lingua, garantir os dereitos lingüísticos da cidadanía e reforzar a colaboración interinstitucional en todos os territorios onde se fala.
Fonte: Gobierno Vasco
Euskarabidea desenvolve tres proxectos de publicación de novos contidos dixitais en éuscaro
Os tres proxectos de contidos dixitais en éuscaro consisten en dous podcast (de 26 capítulos cada un, cun total de 52 audios), que tratan a historia deste idioma en Navarra; sete vídeos para público infantil e familiar; e a renovación do convenio para a promoción de contidos na Wikipedia nesta lingua.
Fonte: Gobierno de Navarra
O Goberno de Cataluña aproba a creación dun órgano para reforzar o papel do catalán como lingua vehicular no ensino
O Consello Lingüístico Asesor, presidido pola profesora Carme Junyent, será o novo órgano que velará polo reforzo do papel do catalán como idioma vehicular no ensino e que se encargará de definir as estratexias necesarias para impulsar esta lingua nos centros educativos de Cataluña.
Fonte: 20minutos
O Concello de Bilbao ofrece ao longo do mes de marzo actividades gratuítas para o fomento do éuscaro
O proxecto Darabilbao, destinado a persoas que queren mellorar o seu nivel de éuscaro, ten como obxectivo impulsar o uso desta lingua no tempo de lecer. Entre as iniciativas organizadas, inclúense seis actividades para familias con menores de entre 4 e 12 anos.
Fonte: Deia
Increméntase a carga horaria da materia de asturiano no Bacharelato
A conselleira de Educación anunciou o incremento no Bacharelato da carga horaria da materia de lingua asturiana, que actualmente é dunha hora, así como un reforzo na etapa de Infantil. Ademais, abordou a creación da especialidade docente de asturiano, que afecta ás condicións das persoas interinas.
Fonte: La Voz de Asturias
Ponse en marcha en Valls unha campaña de fomento do uso do catalán no comercio local
O Concello de Valls organizou unha iniciativa para animar os comerciantes do municipio a que utilicen sempre o catalán no momento de iniciar unha conversa coa clientela e que se manteñan falando esta lingua.
Fonte: Diari Més
Varias sentenzas fixan que o peso do valenciano e do castelán na educación manteña un equilibrio entre ambas as linguas
O Tribunal Superior de Xustiza da Comunidade Valenciana fixou en cinco sentenzas que o peso do valenciano e do castelán na educación plurilingüe manteña unha proporción razoable e garde un equilibrio nos horarios lectivos e na súa repartición entre as materias troncais.
Fonte: 20minutos
Varios colectivos navarros defenden o modelo educativo en éuscaro por consideralo o máis inclusivo
Colectivos do ámbito da educación e o éuscaro, así como organizacións sindicais, animan as familias navarras a matricular os seus fillos e fillas no modelo D, que na súa opinión permite alcanzar unha competencia avanzada nesta lingua e en castelán e adecuada en inglés.
Fonte: Noticias de Navarra
O Parlamento balear aproba unha iniciativa para reclamar que o novo DNI europeo inclúa o catalán
O Parlamento balear aprobou unha iniciativa para reclamarlle ao Goberno español a inclusión do catalán no novo modelo de DNI electrónico europeo, un documento que non incorpora tampouco o galego nin o éuscaro, pero si o inglés, que non é oficial en España.
Fonte: Diario de Mallorca
Boletín
Subscríbase ao boletín
