España
O Goberno reúnese coas CC. AA. con linguas cooficiais para o seguimento das conclusións acordadas no último Consello de Linguas
O Ministerio de Política Territorial e Función Pública solicítalles ás comunidades autónomas que designen un membro do seu persoal para impulsar o cumprimento das obrigacións en materia de linguas, como a tradución de documentos, o acceso ás páxinas web nas linguas oficiais ou a atención á cidadanía.
Fonte: Galicia Confidencial
Demandan que se use o catalán na megafonía do transporte público de Barcelona
Plataforma per la Llengua reclamou a través das súas redes sociais que se use o catalán na megafonía do transporte público da área metropolitana de Barcelona, xa que considera que se vulneran os dereitos lingüísticos da cidadanía.
Fonte: El Independiente
Os acentos diacríticos da lingua catalá desaparecen definitivamente, agás en 15 palabras
Finalizou o período que concedeu en 2016 o Instituto de Estudos Cataláns para adaptarse á modificación ortográfica pola que se eliminan a maioría dos acentos diacríticos da lingua catalá, agás en 15 das 150 palabras que historicamente levaron este acento.
Fonte: 20minutos
O catedrático de sociolingüística Francesc Xavier Vila será o novo secretario de Política Lingüística
Francesc Xavier Vila, catedrático de sociolingüística da Universidade de Barcelona, será o novo secretario de Política Lingüística. Substituirá á antiga directora xeral, Esther Franquesa, neste departamento que agora elevou o seu rango para converter a diversidade lingüística de Cataluña nun dos eixes principais do Departamento de Cultura.
Fonte: Generalitat de Catalunya
Dous proxectos relacionados co éuscaro impulsados por Euskarabidea reciben o recoñecemento de boas prácticas do Consello de Europa
O Consello de Europa recoñeceu como exemplos de boas prácticas os proxectos 'HiruKo Ituna' e 'Sarean Euskaraz', seleccionados dentro da convocatoria de 2019, para recoñecer as actividades relacionadas coa aplicación da Carta Europea das Linguas Rexionais ou Minoritarias (CELRM).
Fonte: 20minutos
Convócase a Bolsa Joan Veny destinada a proxectos que estuden aspectos vinculados coa variación lingüística do catalán
O Instituto Ramon Muntaner convoca a VIII Bolsa Joan Veny cuxo importe é de 6000 euros e que se concede a proxectos que estuden calquera aspecto relacionado coa variación lingüística do catalán.
Fonte: Generalitat de Catalunya
O Concello de Eskoriatza publica as axudas para a aprendizaxe do éuscaro
O Boletín Oficial de Guipúscoa publicou a convocatoria de subvencións con dúas modalidades: unha para a aprendizaxe do éuscaro e outra para reforzos lingüísticos da poboación de entre 3 e 12 anos.
Fonte: Diario Vasco
O Concello de Irún recorre a sentenza que considera discriminatoria a obrigatoriedade do éuscaro para optar a unha praza de policía local
O Concello de Irún presentou un recurso ante a Sala do Contencioso-Administrativo do Tribunal Superior de Xustiza do País Vasco contra a sentenza que consideraba discriminatoria a obrigatoriedade de saber éuscaro para optar a unha praza na Policía Local.
Fonte: El Diario
O éuscaro, o aragonés e o occitano sentan as bases dunha rede de excelencia lingüística transpirenaica
Varias institucións políticas e académicas levan traballando os últimos tres anos no proxecto transfronteirizo Linguatec, unha cooperación que porá ao servizo do éuscaro, o aragonés e o occitano os últimos avances en intelixencia artificial.
Fonte: Swissinfo
A maioría dos habitantes de Navia-Eo pide que o galego-asturiano teña un trato igualitario
Segundo un estudo da Academia da Lingua Asturiana, un 75 % dos habitantes de Navia-Eo pensa que o galego-asturiano merece o mesmo trato que o catalán, o vasco e o galego.
Fonte: 20 minutos
Boletín
Subscríbase ao boletín
