O Goberno vasco, en colaboración coa Axencia de Desenvolvemento de Oarsoaldea, pon en marcha unha campaña que, baixo o lema 'Betikoa. Gertukoa. Eskatu euskaraz, eskaini euskaraz', busca fomentar o éuscaro no comercio, en liña cos obxectivos do plan de promoción desta lingua no ámbito socioeconómico.

Fonte: Diario Vasco

Dende o ano 2017 a Generalitat de Cataluña vén organizando accións de sensibilización sobre o uso do catalán en 406 marcas líder de 38 sectores empresariais diferentes, ás que lles solicita que empreguen esta lingua nas súas redes sociais, xa que se trata de canles de comunicación de especial relevancia nos últimos tempos.

Fonte: Generalitat de Catalunya

O Goberno vasco entregou os certificados Bikain de calidade do éuscaro, unha distinción que, nesta edición, recaeu en 17 entidades, nove das cales obtiveron o certificado de nivel superior, catro, o de nivel medio e outras catro, o básico. En canto á natureza das entidades, once delas eran de carácter privado e seis, público.

Fonte: 20minutos

Co lema ‘Català i empresa’ o Departamento de Cultura iniciou unha campaña de sensibilización dirixida a grandes marcas, emprendedores e establecementos comerciais que se difundirá a través das redes sociais co cancelo #CatalàiEmpresa.

Fonte: Generalitat de Catalunya

A Plataforma per la Llengua considera que o catalán está nunha situación de emerxencia lingüística. Segundo esta entidade, nos últimos quince anos, esta lingua perdeu medio millón de falantes habituais e apenas o usan o 32 % das persoas que o saben falar.

Fonte: e-Notícies

Apenas a metade dos videoxogos creados por estudios de Cataluña están dispoñibles en catalán e do total de videoxogos existentes, só un 5,5 % está nesta lingua. Isto a pesar de que a Generalitat impulsa o seu uso, con subvencións e outras iniciativas, e das accións do activismo lingüístico.

Fonte: El Periódico

O Consello do Audiovisual de Cataluña (CAC) aprobou un acordo con alegacións ao proxecto de lei xeral de comunicación audiovisual e que supón a transposición da Directiva 2010/13 / UE. Nestas alegacións sinálase a necesidade dun novo enfoque que reflicta a diversidade cultural e lingüística do Estado español.

Fonte: Nós Diario

O Goberno de Aragón busca facilitar o acceso a recursos dispoñibles na rede que contribúan á difusión do aragonés e a fomentar o seu uso, así como a dar a coñecer a súa riqueza. Por este motivo, puxo en marcha unha aplicación móbil, coa colaboración de asociacións, empresas, institucións e particulares, coa que poder acceder a todas as ferramentas tecnolóxicas relacionadas con esta lingua.

Fonte: La Vanguardia

O Goberno de Cataluña acaba de poñer en marcha o proxecto Aina para crear un corpus lingüístico e modelos informáticos que permitan que o catalán se converta nunha lingua competitiva no mundo dixital. Búscase así que as empresas que desenvolven aplicacións baseadas na intelixencia artificial poidan empregalo ao mesmo nivel que outros idiomas como o inglés ou o castelán.

Fonte: La  Vanguardia

A Mancomunidade de Municipios Euscaldúns queixouse ante o Parlamento Foral da grave situación sociolingüística nalgúns dos servizos dos 14 concellos que a integran. Concretamente, denunciou o que está a acontecer nalgúns centros de atención primaria de varias localidades, nos que non se respecta o dereito a recibir atención en éuscaro.

Fonte: Diario de Navarra