O Goberno de Navarra, a través de Euskarabidea, concedeulles a trece empresas da comunidade axudas por un valor de 68 000 euros para fomentar o uso do éuscaro nos centros de traballo.

Fonte: Diario de Navarra

Coa incorporación do catalán ás opcións de idiomas de Telegram xa son 16 as linguas que ofrece esta plataforma de mensaxería instantánea, dispoñible para dispositivos Android, iOS, TDesktop e macOS.

Fonte: Generalitat de Cataluña

A Consellería de Educación e Cultura entrega no paraninfo da Universidade de Oviedo os seis premios literarios en asturiano convocados este ano, que teñen como obxectivo consolidar esta lingua como vehículo de expresión literaria.

Fonte: El Búscolu

'Prou de valencianofòbia' é unha campaña, impulsada pola Plataforma per la Llengua, que denuncia a discriminación lingüística e reivindica o dereito a falar valenciano en calquera ámbito.

Fonte: La Vanguardia

O Plan estratéxico para o fomento do éuscaro, aprobado polo Consello de Goberno da Deputación Foral de Áraba, ten como obxectivo promover o uso desta lingua no territorio arabés así como no condado de Treviño.

Fonte: 20 minutos

A Xunta de Galicia reuniuse en Oviedo co comité de expertos encargado do seguimento da Carta Europea das Linguas Rexionais ou Minoritarias (CELRM), o tratado internacional subscrito por España e ratificado no ano 2001 a prol do uso das linguas cooficiais.

Fonte: O Portal da Lingua Galega

Movistar+ vai recibir apoio da Dirección Xeral de Política Lingüística para subtitular en catalán 250 películas e 60 series este ano, unha iniciativa coa que a Generalitat pretende amosar a súa aposta por incrementar a oferta audiovisual en televisión nesta lingua.

Fonte: La Vanguardia

A Dirección Insular de Política Lingüística concedeulles axudas para impulsar o uso do catalán a un total de 33 empresas, ás que se destinaron 136.450 euros, e a 18 entidades sen ánimo de lucro, que se repartirán 102.491 euros. O obxectivo desta convocatoria é ampliar a presenza desta lingua na illa de Mallorca.

Fonte: La Vanguardia

A Universidade de Zaragoza aprobou a posta en marcha da especialidade de aragonés para os graos de Maxisterio de Educación Primaria e de Educación Infantil. Trátase de que o alumnado destas titulacións poida dedicarse á docencia da materia de Lingua Aragonesa nos centros educativos desta comunidade.

Fonte: Heraldo

A Consellería de Cultura ampliará en 2019 as axudas destinadas a medios de comunicación que fomenten o catalán, a través de máis liñas e maior flexibilidade para que un maior número de medios resulte beneficiado.  

Fonte: La Vanguardia