España
A Deputación de Valencia entrega os seus galardóns ao uso do valenciano no comercio local
A Deputación de Valencia entregou os IV Premios de uso do valenciano no comercio local que distinguen unha trintena de establecementos da provincia pola súa contribución á defensa da lingua propia. Os galardoados agradeceron o apoio institucional, que lles serve de estímulo para integrar o valenciano en toda a súa comunicación.
Fonte: Diputació de València
Barcelona acolle unha nova edición da Semana do Libro de Catalán
A 43ª edición da Semana do Libro en Catalán comezou en Barcelona cun espazo ampliado de 8900 m², 94 casetas, 312 expositores e máis de 300 actividades. O evento reforza a aposta pola literatura infantil e xuvenil e incorpora novos espazos de lectura, conversa e promoción da lingua catalá.
Fonte: Diari de la Llengua
O Concello de Bilbao anima o comercio e a hostalería a achegarse ao éuscaro a través dun novo programa
O Concello de Bilbao impulsa o programa Biribilko para que persoal de comercio e hostalería mellore o seu nivel de éuscaro e poida empregalo coa clientela, empresas provedoras... Os cursos, de 90 horas e dous niveis, desenvolveranse de outubro de 2025 a xuño de 2026 en euskaltegis homologados, cun custo de 90 euros que se devolverá ao alumnado con asistencia mínima do 75 %. Ademais, ofrécese servizo gratuíto de tradución de carteis e materiais públicos, así como dicionarios especializados.
Fonte: Bilboko Udala
Elhuyar crea unha ferramenta para dobrar vídeos a seis linguas
Elhuyar lanza un novo servizo na súa plataforma Aditu que permite dobrar vídeos en éuscaro, castelán, francés, inglés, galego e catalán, mantendo mesmo o ton e o acento da voz orixinal. A ferramenta, baseada en intelixencia artificial e redes neuronais, facilita tamén transcricións, subtítulos e traducións automáticas, e ofrece un resultado editable e sen erros.
Fonte: El Correo
O castelán despraza o catalán como lingua das investigacións nas revistas científicas catalás
Un estudo revela que o castelán despraza o catalán como lingua das publicacións científicas en revistas catalás, con case o 70 % dos artigos en castelán fronte ao 9 % en catalán e o 25 % en inglés. A presión dos índices internacionais e das políticas de acreditación favorece a escrita en inglés e resta prestixio ao catalán, ao que se suma a falta de recursos e apoio institucional.
Fonte: Diari de la Llengua
O Goberno vasco convoca axudas para a promoción e normalización do éuscaro
O Goberno vasco convoca as axudas Euskalgintza 2025, cun orzamento de 1,7 millóns de euros para apoiar proxectos de promoción, desenvolvemento e normalización do éuscaro. As subvencións destínanse, entre outras, a iniciativas de lecer xuvenil, achegamento da lingua a persoas inmigrantes, contidos dixitais, transmisión familiar, fomento da lectura etc.
Fonte: Gobierno Vasco
Modifícase o proxecto de Lei de atención ao cliente para garantir os dereitos lingüísticos das persoas consumidoras
Os cambios na Lei de atención ao cliente buscan garantir que a cidadanía poida ser atendida en catalán. As empresas con máis de 250 persoas empregadas ou máis de 50 millóns de facturación deberán ofrecer servizo na lingua oficial que escolla o consumidor, e o persoal terá que recibir formación en catalán. A medida abrangue sectores como enerxía, banca, telecomunicacións ou transporte.
Fonte: Diari de la Llengua
O Concello de Donostia organiza Mintzaon, unha actividade extraescolar lúdica para a promoción do éuscaro
O Concello de Donostia pon en marcha Mintzaon, unha actividade gratuíta en liña destinada a menores de 8 a 14 anos para fomentar a oralidade en éuscaro fóra da escola. A proposta, que funcionará de outubro a maio, desenvólvese en grupos reducidos con acompañamento de persoas dinamizadoras e combina xogos, música e retos nun ambiente distendido. Tras os bos resultados das probas anteriores, o programa busca reforzar o uso do éuscaro tamén no ámbito dixital e introducir a lingua en fogares onde non se emprega habitualmente.
Fonte: Donostiako Udala
As persoas que conduzan taxis e VTC en Cataluña deberán acreditar un nivel B1 de catalán
O Parlamento de Cataluña recibirá unha proposta de lei que obrigará as persoas condutoras de taxis e VTC a acreditar un nivel mínimo de catalán B1 no prazo de dous anos, incluíndo quen xa estea en activo. A iniciativa pretende reforzar os dereitos lingüísticos da clientela e podería marcar un precedente para outros sectores profesionais. As entidades promotoras seguen a reclamar que o requisito sexa un B2 e demandan recursos públicos para facilitar a aprendizaxe da lingua.
Fonte: Diari de la Llengua
Barakaldo lanza dúas liñas de axudas para impulsar o uso do éuscaro no municipio
O Concello de Barakaldo destina 40 000 euros a apoiar o uso do éuscaro: 35 000 para sufragar gastos de matrícula en cursos realizados pola veciñanza e 5000 para subvencionar a rotulación en éuscaro nos locais comerciais e hostaleiros. As axudas pretenden aumentar a visibilidade da lingua na cidade e pódense solicitar de forma presencial ou en liña dentro dos prazos establecidos.
Fonte: En Barakaldo
Boletín
Subscríbase ao boletín
