O proxecto Landue pechou o ano cun acto no Elkartegi de Durango, onde empresas, institucións e axentes sociais reafirmaron o compromiso de crear espazos laborais e socioeconómicos euscaldúns. A iniciativa, impulsada pola Mancomunidade de Durangaldea, o Goberno vasco e a Deputación de Biscaia, busca introducir o éuscaro na xestión interna, na atención profesional e nas prácticas do alumnado de FP.

Fonte: El Correo

A Deputación Foral de Áraba concede unha axuda directa de 35 841,80 euros a Euskaltzaindia, a Real Academia da Lingua Vasca, para impulsar en 2025 o programa Euskararen Biziberritzea Araban, nun convenio que fixa unha colaboración estable ata 2027 coa finalidade de reforzar o uso social do éuscaro.

Fonte: Radio Llodio

A Confederación Estatal de Persoas Xordas (CNSE) presentou unha investigación pioneira que visibiliza as violencias específicas que sofren as mulleres xordas, con especial atención ás agresións lingüísticas e culturais, que condicionan a súa autonomía e dignidade. O estudo revela barreiras estruturais moi graves: dificultades para acceder a servizos básicos, falta de intérpretes en situacións críticas e procesos xudiciais pouco accesibles. Os datos mostran porcentaxes elevadas de violencia exercida por parellas e de violencia institucional que obriga moitas mulleres a renunciar a atencións esenciais.

Fonte: Diari de la DisCapacitat

A IA de Meta, integrada en WhatsApp, Facebook e Instagram, xa pode comunicarse en catalán. Este avance permítelles ás persoas usuarias manter conversas, traducir textos ou realizar consultas directamente en catalán. Meta atribúe a ausencia inicial deste idioma a limitacións do lanzamento europeo e asegura estar a perfeccionar o sistema, que incorpora correctores e mecanismos de mellora continua.

Fonte: Diari de la Llengua

A Sección Filolóxica do IEC incorporou 117 voces novas e realizou 258 modificacións no Diccionari de la llengua catalana, nun total de 375 novidades que amplían o estándar e reforzan a representación territorial da lingua. Entre os termos engadidos figuran préstamos internacionais, vocabulario gastronómico e variantes dialectais, mentres que as actualizacións perfeccionan definicións e usos en ámbitos como a tecnoloxía, as locucións coloquiais ou a denominación de bebidas. A obra normativa continúa así o proceso de revisión iniciado tras a súa segunda edición de 2007, coas actualizacións dispoñibles de inmediato na versión en liña.

Fonte: Diari de la Llengua

A Enquisa de usos lingüísticas de 2023 confirma que Cataluña presenta realidades sociolingüísticas moi diversas, condicionadas por dinámicas demográficas propias de cada zona. A maioría dos territorios manteñen niveis de coñecemento e uso do catalán por riba da media, mentres que o ámbito metropolitano de Barcelona fica por debaixo debido á forte diversidade de procedencias. O conxunto dos datos mostra que o aumento de novos falantes non compensa o impacto das chegadas e provoca unha perda porcentual do uso do catalán.

Fonte: Generalitat de Catalunya

Na XXII Noite de Escola Valenciana, entregáronse tres recoñecementos á defensa do valenciano. O xornalista Iván Esteve foi premiado por a súa traxectoria en favor do periodismo nesta lingua. A Confederación Gonzalo Anaya recibiu o galardón polo seu traballo na protección do ensino en valenciano e a Fundación Casal Jaume I Safor-Valldigna foi recoñecida por máis de tres décadas de dinamización cultural neste idioma.

Fonte: Diari de la Llengua

A Enquisa de Usos Lingüísticos de 2023 mostra un forte cambio demográfico no Val d’Aran pola chegada de nova poboación, mais tamén unha notable estabilidade no coñecemento e o uso do aranés. A maioría das persoas nadas na zona manteno como lingua inicial, habitual e de identificación, e a transmisión interxeracional continúa sólida. Porén, o uso social segue limitado en ámbitos como o comercio, a sanidade e as administracións non locais. As institucións aranesas e catalás propoñen facilitar a aprendizaxe para a poboación chegada recentemente e reforzar a presenza do idioma entre a mocidade e nos sectores profesionais para garantir o seu futuro.

Fonte: Generalitat de Catalunya

O Departamento de Política Lingüística concedeu as Beques Propulsió 2025, ás que se presentaron 355 propostas e das que resultaron seleccionados 40 proxectos de creación de contidos en catalán. A iniciativa, que duplicou o número de axudas respecto da primeira edición, confirma a vitalidade dun sector esencial para fortalecer a lingua no ámbito dixital.

Fonte: Generalitat de Catalunya

A Unión de Federacións Deportivas Vascas reforza a súa estratexia de promoción do éuscaro cunha nova edición de «Gu Geu, Kirola Euskaraz», centrada no papel das persoas adestradoras como referentes lingüísticos. Este ano son xa 23 as federacións adheridas ao acordo co Goberno vasco, que recoñeceu o seu compromiso nun acto en Vitoria-Gasteiz. Ademais de campañas de sensibilización, impúlsanse diagnósticos, plans de lingua e cursos formativos, cada vez máis demandados e con maior presenza do éuscaro. A iniciativa procura consolidar un espazo deportivo inclusivo e euscaldún, no que a mocidade poida usar a lingua con naturalidade e confianza.

Fonte: Gobierno Vasco