O Goberno Vasco e a organización NABO asinaron un acordo estratéxico para impulsar a ensinanza do éuscaro nas Euskal Etxeak dos Estados Unidos. A iniciativa, enmarcada no programa Euskara Munduan, busca formar docentes dentro das propias comunidades para garantir a transmisión do idioma sen depender de profesorado externo.

Fonte: Gobierno Vasco

O Ministerio de Xustiza trasladoulles aos xulgados das Illas Baleares a indicación de empregar unicamente os topónimos oficiais en catalán, como Eivissa, Maó ou Ciutadella, mesmo nos documentos redactados en castelán. A medida responde así a unha demanda histórica de entidades que defenden o uso do catalán e baséase na lexislación vixente, que recoñece estes nomes como os únicos legalmente válidos.

Fonte: Nou Diari

A Obra Cultural Balear acusa o Goberno do arquipélago de vulnerar a lexislación vixente ao suprimir na canle televisiva IB3 a opción de audio en catalán nas estreas cinematográficas, feito que considera un retroceso na normalización lingüística. A entidade reclama unha rectificación inmediata e lembra que a programación da televisión pública debe cumprir unha función social. Alertan de que sen contidos en catalán, a canle perde o seu sentido autonómico, nun panorama xa saturado de ofertas en castelán.

Fonte: Diari de la Llengua

Iniciativa pol Asturianu consolida a súa presenza na Feira Internacional de Mostras de Asturias 2025 cun espazo propio que reúne numerosas empresas que empregan o asturiano na súa actividade. A entidade busca amosar o potencial económico e social desta lingua, organizando tamén actos culturais e un día dedicado ao asturiano en homenaxe ao escritor Xuan Bello. Promóvese ademais unha campaña para captar persoas socias, entregando un dicionario como agasallo. O obxectivo é reforzar o prestixio do asturiano como motor de riqueza e identidade.

Fonte: La Voz de Asturias

Este programa ofrece durante o verán un espazo flexible para practicar catalán en contornas informais e culturais. As parellas lingüísticas poden atoparse presencialmente ou por videoconferencia, segundo as súas necesidades. O obxectivo é reforzar a fluidez e a confianza no idioma sen interrupcións estacionais.

Fonte: Generalitat de Catalunya

O Goberno balear impulsará este ano unha macroenquisa sobre os usos lingüísticos para actualizar os datos de 2014, cando xa se detectara unha diminución do uso social do catalán, e avaliar así o estado actual desta lingua no arquipélago. O estudo analizará variables como o coñecemento do idioma, a súa utilización habitual e a orixe das persoas entrevistadas, nun contexto de forte crecemento da poboación estranxeira.

Fonte: Última Hora

O Concello de Pamplona convoca o XXXV Certame literario en éuscaro para autoría novel nas modalidades de poesía e narrativa, dirixido a persoas nacidas ou residentes en Navarra. As obras deberán ser orixinais e inéditas, e poderán presentarse ata o 27 de outubro. O concurso reparte 9000 euros en premios.

Fonte: Iruñeko Udala

O Termcat acaba de incorporar 92 novos termos cataláns ao seu repertorio normativo, que abranguen ámbitos como as TIC, a zooloxía, a economía e a comunicación. Destacan os conceptos ligados á intelixencia artificial, os nomes das especies de morcegos e novas formas na linguaxe inclusiva e clara.

Fonte: Diari de la Llengua

O Concello de Vila-real recibirá máis de 27 000 euros polo seu labor a prol da normalización do valenciano, con iniciativas en ámbitos educativos, culturais e sociais. A achega sitúa a cidade como a segunda con maior subvención autonómica, só por detrás de Valencia.

Fonte: Castellón Plaza

O número de persoas que deciden estudar catalán na Universidade Pompeu Fabra medrou un 15 % no curso 2024-2025. Este interese ascendente, que se mantén desde hai cinco anos, reflicte o éxito das políticas de acollida lingüística e cultural da universidade, así como o compromiso por ampliar a formación en catalán para toda a comunidade académica.

Fonte: Diari de la Llengua