España
Nace o Correllengua Agermanat, unha carreira que busca superar as barreiras administrativas e reivindicar a unidade do catalán
Máis dun cento de entidades presentaron o Correllengua Agermanat, unha nova iniciativa que busca unir os territorios de fala catalá e reivindicar a lingua como vínculo común. A partir do 19 de abril de 2026, percorrerá 17 etapas e máis de 1500 quilómetros, pasando por Cataluña, Comunidade Valenciana, Cataluña Norte ou L’Alguer.
Fonte: Diari de la Llengua
A Universidade das Illas Baleares aproba o Plan de linguas 2026-2030 para fomentar o uso do catalán como lingua propia da institución
O Plan de linguas 2026-2030 define a estratexia da UIB para reforzar o uso do catalán e promover o multilingüismo. O documento busca consolidar o catalán como lingua propia da institución e potenciar a diversidade lingüística como ferramenta de apertura internacional. Entre os seus obxectivos destacan garantir os dereitos lingüísticos da comunidade universitaria, mellorar a competencia comunicativa e fomentar o uso do catalán en todos os ámbitos académicos e administrativos mediante formación, programas de acollida e apoio á docencia e investigación nesta lingua.
Fonte: Última Hora
Valentín García pon en valor “os avances da Xunta para intensificar a presenza do galego no eido dixital”
O secretario xeral da Lingua, Valentín García, participou en Donostia nunha xornada dedicada ao impulso das linguas oficiais do Estado na intelixencia artificial, tras formar parte, xunto cos seus homólogos do País Vasco, Cataluña, Navarra, Comunidade Valenciana e Illas Baleares, na constitución do novo Consejo de las Lenguas Oficiales, órgano estatal de seguimento en materia de política lingüística.
Fonte: O Portal da Lingua Galega
Sete centros de secundaria de Pamplona participan no programa «Sartu eta Sortu» que busca reforzar o vínculo da mocidade co éuscaro
O Concello de Pamplona impulsa unha nova edición do programa «Sartu eta Sortu», destinado a fomentar o uso social e cultural do éuscaro entre o alumnado de primeiro da ESO. Sete centros do modelo D participan nesta iniciativa, que ofrece encontros en éuscaro con creadoras e creadores recoñecidos da cultura, a ciencia e o deporte.
Fonte: Pamplona Actual
Comeza a quinta edición do ciclo «Gora Gora Fest!» que levará unha ampla oferta de actividades en éuscaro por toda Navarra
O Goberno de Navarra, a través de Euskarabidea, pon en marcha a 5ª edición do «Gora Gora Fest!» 2025, un ciclo cultural en éuscaro con dez espectáculos gratuítos que percorrerán 65 localidades entre o 7 de novembro e o 14 de decembro. A proposta diríxese a nenas/os, mocidade e familias e prioriza concellos de menos de 3000 habitantes, para achegarlles oferta cultural en éuscaro onde apenas existe.
Fonte: Gobierno de Navarra
Ponse en marcha a segunda edición Correllengua Universitari para impulsar o uso do catalán nas universidades
Comeza a segunda edición do Correllengua Universitario, destinado a fortalecer o uso do catalán nas universidades e a formar o alumnado sobre os seus dereitos lingüísticos. Durante varios días, diferentes universidades catalás acollerán actividades culturais e educativas para reivindicar a lingua e a cultura propias. A iniciativa pretende que o estudantado poida detectar e denunciar vulneracións das normas que protexen o catalán e ofrecerlle guías e materiais prácticos para facelo.
Fonte: Diari de la Llengua
O programa de cinema infantil en catalán retoma a súa actividade con máis de 170 proxeccións
O programa de Cinema Infantil en Català (CINC), impulsado polo Departamento de Política Lingüística, reactivouse este outubro con 174 proxeccións en 32 localidades de Cataluña e Aragón. A iniciativa ofrece películas dobradas ao catalán, a prezos reducidos e cunha ampla distribución territorial co obxectivo é ampliar a oferta e o consumo de cinema en catalán.
Fonte: Generalitat de Catalunya
O concurso de trivial Gurot impulsará o uso do éuscaro entre a mocidade de Durangaldea
A Mancomunidade de Durangaldea impulsa unha nova edición do concurso Gurot, destinado á mocidade de 12 a 18 anos para fomentar o uso do éuscaro dun xeito lúdico e educativo. Este ano o certame preséntase en formato de microconcursos individuais, que se celebrarán os xoves de novembro.
Fonte: Durangoko Udala
Corenta proxectos de creación de contidos en catalán resultan beneficiarios das bolsas Propulsió 2025
O Departamento de Política Lingüística de Cataluña publicou a resolución das Bolsas Propulsió 2025, destinadas a apoiar a creación de contidos en catalán nas redes e a profesionalización das persoas dedicadas á creación dixital. Nesta segunda edición foron seleccionados 40 proxectos de ámbitos como a cultura, a ciencia, a música, o humor, o deporte ou os videoxogos, que se difundirán en YouTube, TikTok e Instagram. As iniciativas premiadas destacan pola súa diversidade temática e polo seu papel na promoción do catalán como lingua de creación contemporánea no espazo dixital.
Fonte: Generalitat de Catalunya
A Generalitat de Cataluña regula o nivel A1 de catalán ante a demanda crecente de realización de probas
O Goberno catalán aprobou a modificación do Decreto 37/2024 sobre avaliación e certificación do coñecemento do catalán, co obxectivo de regular o nivel A1 e permitir máis dunha proba ordinaria ao ano. A medida responde ao aumento da demanda de acreditación lingüística, especialmente entre persoas migrantes, xa que o nivel A1 é relevante para os trámites de arraigamento. A nova normativa facilitará convocatorias libres e o recoñecemento de certificados doutras entidades, ademais de flexibilizar o calendario anual de exames oficiais.
Fonte: Generalitat de Catalunya
Boletín
Subscríbase ao boletín
