O Goberno vasco, as tres deputacións e a Asociación de Municipios Vascos (Eudel) aprobaron unha declaración institucional con motivo do Día Internacional do Éuscaro, que se celebra o mércores 3 de decembro, na que rexeitan "a imposición en materia de política lingüística, sexa cal sexa, éuscaro ou castelán, a lingua que pretenda impoñerse". O texto, non obstante, considera "perversa" a identificación de regulación e imposición.

Fonte: Europa Press

Escola Valenciana anunciou a presentación dun "documento base" para aplicar o plurilingüismo nos centros educativos valencianos que ofrecerá á Generalitat Valenciana para comezar o "diálogo construtivo da escola do século XXI". O texto aposta polo bilingüismo e pola aplicación do inglés de acordo con módulos en materias segundo o contexto de cada centro, tal e como avanzaron fontes do colectivo.

Fonte: Panorama Actual

Son un total de 20 establecementos de Reus, Cambrils e Falset os que se adheriron á campaña 'Jocs en català' (Xogos en catalán) que impulsa o Centre de Normalització Lingüística da Área de Reus Miquel Ventura. O obxectivo é que a clientela coñeza que xogos e xoguetes hai no mercado en catalán e onde os pode adquirir.

Fonte: Avui

A Consellería de Interior do Goberno catalán sostén que os mossos d'esquadra deben falar preferentemente en catalán "tanto nas súas comunicacións orais coma escritas, internas e externas". A polémica xurdiu ante a sanción a un mosso por redactar unhas dilixencias en castelán.

Fonte: El Economista

Un total de 1.629 alumnos dos colexios vascos pasaron o curso pasado ao modelo A (todas as materias en castelán), tras ter estado matriculados nos modelos B (metade en castelán, metade en éuscaro) e D (todo en éuscaro).

Fonte: 20minutos

Escola Valenciana entregou na Consellería de Educación un "documento de base" no que propón 14 puntos para consolidar un modelo plurilingüe -castelán, valenciano e inglés- no sistema educativo público e que inclúe, entre outras peticións, 3000 profesores trilingües máis nos niveis de infantil e primaria, traballar por módulos en lingua inglesa desde os 4 anos con índices ao 50 % e aumentar a formación do profesorado. Ao documento uníuselle unha petición de entrevista co conselleiro de Educación, Alejandro Font de Mora.

Fonte: El Mundo

O Padroado da Fundación Instituto Castellano y Leonés de la Lengua aprobou na reunión que mantivo en Burgos un presuposto de 1,4 millóns de euros para 2009.

Fonte: El Mundo

Máis de 21.700 alumnos cursan Lingua Asturiana nas distintas etapas do ensino non universitario dos centros sostidos con fondos públicos do Principado, unha cifra que experimentou un incremento do 9% durante os tres últimos cursos, segundo datos facilitados nunha nota de prensa pola Consellería de Educación.

Fonte: Europa Press

A Generalitat Valenciana non pode seguir excluíndo a licenciatura en Filoloxía Catalá como título que acredita o coñecemento do valenciano. Estableceuno hai unhas semanas o Tribunal Supremo nunha sentenza dada a coñecer polo STEPV. Nela desestima o recurso de casación interposto polo Consell, e confirma o que o Tribunal Superior de Xustiza ordenou xa nada menos que 14 veces: os licenciados en Filoloxía Catalá non teñen que pasar o exame de valenciano para presentarse ás convocatorias de docentes non universitarios.

Fonte: El País

O 10% do orzamento do Padroado de Éuscaro dedícase a subvencionar a súa aprendizaxe. Con motivo da celebración o día 3 de decembro do Día Internacional do Éuscaro, a concelleira de Normalización Lingüística de San Sebastián, Ainhoa Beola fixo un balance «moi positivo» das 107 actuacións levadas a cabo polo Padroado ao longo do ano.

Fonte: Diario Vasco