O conselleiro de Saúde, Vicenç Thomàs, asegurou que non retirará o decreto que estipula o coñecemento do catalán entre os profesionais da sanidade pública en Baleares, algo polo que o PP o acusou de dar prioridade á lingua sobre a asistencia sanitaria.

Fonte: Diario de Mallorca

Patxi Baztarrika e Erramun Osa, de Política Lingüística do Goberno vasco, presentaron o martes día 9 de decembro no Palacio de Congresos do Kursaal a representantes do ámbito político, social e cultural de Guipúscoa os pasos que se deron ata o momento no proceso de reflexión Euskara 21, que quere poñer unhas bases para a política lingüística deste novo século.

Fonte: Diario Vasco

Todas as linguas estranxeiras faladas polo colectivo inmigrante "forman parte do patrimonio cultural de Cataluña", segundo afirmou en Barcelona o vicepresidente da Generalitat de Catalunya, Josep Lluís Carod-Rovira, durante a inauguración do V Foro de Linguas Amerindias, organizado por Casa América Cataluña.

Fonte: Latinoamérica Exterior

O Concello de Durango puxo en marcha unha iniciativa a través do programa 'Guk euskaraz' que consiste en repartir polos establecementos hostaleiros panos de mesa cun lema que recorda o agradable que resulta expresarse en éuscaro, fomentando así o uso desa lingua.

Fonte: El Correo Digital

Todos os grupos municipais do Concello de Barcelona, agás o PP, votaron a favor dunha proposición de ERC á Comisión de Presidencia que obriga o Concello a constituír unha comisión con representación de todos os grupos municipais e o Institut d'Estudis Catalans (IEC) para confeccionar o regulamento de usos lingüísticos do Concello durante o ano 2009.

Fonte: Avui

A escolarización en lingua asturiana nos colexios públicos elevouse un punto respecto ao ano pasado nos ciclos de primaria e alcanza o 60 por cento no curso 2008/ 2009 mentres que na educación secundaria obrigatoria (ES0) se mantén no 19 por cento.

Fonte: La Nueva España

O director do Institut Ramon Llull, Josep Bargalló, compareceu ante a Comisión de Política Cultural do Parlamento de Cataluña para explicar as políticas do Institut para a proxección exterior da lingua catalá.

Fonte: Institut Ramon Llull

O fenómeno da inmigración posibilitou que nas cidades e vilas de Euskadi se falen máis dun centenar de linguas diferentes de catro continentes, segundo un estudo do Observatorio Vasco da Inmigración, Ikuspegi. A chegada de miles de persoas de 170 nacionalidades diferentes converteu a Comunidade Autónoma Vasca (CAV) nunha especie de Babel na que, no entanto, o castelán mesmo gañou enteiros.

Fonte: Noticias de Gipuzkoa

Con esta iniciativa preténdese promover paulatina e progresivamente o uso do éuscaro no ámbito da telefonía móbil. Os anuncios poderanse ver e oír, tanto na televisión coma na radio e nos periódicos nunha campaña que se inicia o día 13 de decembro e finalizará o 5 de xaneiro. 174 modelos distintos de diferentes compañías no mercado incorporan xa o éuscaro nas opcións de idioma dos seus menús e aplicacións.

Fonte: Goberno vasco

O día 15 de xaneiro a gaiteira ourensá Susana Seivane recollerá en Ponferrada un premio «por ser unha gran difusora do idioma galego», segundo explican desde a asociación Xarmenta de promoción do uso do galego na comarca leonesa do Bierzo.

Fonte: La Voz de Galicia