RTVE, La Xarxa e 3Cat lanzan unha convocatoria conxunta para seleccionar documentais en catalán, que serán coproducidos e emitidos polas tres corporacións. A iniciativa busca fomentar a produción audiovisual nesta lingua, apoiar a industria e promover contidos de calidade. O orzamento total ascende a 470.000 euros, cun aumento significativo respecto a anos anteriores.

Fonte: RTVE

O Instituto de Estudos Cataláns presentou o Corpus da lingua de signos catalá (LSC), unha ferramenta pioneira para a súa estandarización e investigación. O proxecto documenta o estado actual da LSC, recolle variacións lingüísticas e facilita a creación de dicionarios e bases de datos. A comunidade xorda valórao como un avance esencial, aínda que reclama unha maior rapidez na mellora da accesibilidade e no recoñecemento da LSC.

Fonte: dBalears

A Comisión sobre o Catalán no Contorno Dixital concluíu cun informe que propón un plan local de lingua en Barcelona para fomentar o uso do catalán, especialmente entre a mocidade, para o que se recomenda  integrar a lingua nas políticas xuvenís, culturais e comunitarias. As propostas inclúen impulsar referentes xuvenís en internet, implicar a mocidade na creación de contidos institucionais e lanzar campañas que vinculen o catalán coa identidade barcelonesa.

Fonte: Ajuntament de Barcelona

O Goberno de Navarra, a través de Euskarabidea, lanza a campaña «Dales nuestro legado, dales euskera / Emaiezu hemengoa, emaiezu euskara» dirixida ás familias para fomentar o uso do éuscaro na infancia. A campaña terá ampla difusión en medios e espazos públicos e contará cun orzamento de 55 000 euros.

Fonte: Gobierno de Navarra

O alumnado do mestrado de formación do profesorado na especialidade de asturiano denuncia que a Universidade de Oviedo impide presentar todos os traballos nesta lingua. Consideran que se está vulnerando o seu dereito a empregala, mentres que o decanato argumenta que só se garante o seu uso nas materias específicas, xa que non existe unha normativa que obrigue a avaliala no resto de disciplinas comúns con outras especialidades.

Fonte: RTPA

EITB lanza Guau, unha plataforma gratuíta de audio que recolle contidos en éuscaro, incluíndo radio en directo, programas a demanda, podcasts e audiolibros. O seu obxectivo é fortalecer o ecosistema vasco de audio e garantir a presenza do éuscaro nos novos formatos de consumo. Guau integra as emisoras de EITB e máis de 150 podcasts e irá ampliando progresivamente o seu catálogo.

Fonte: Panorama Audiovisual

O Concello de Lleida xa conta cun plan estratéxico para impulsar o uso social do catalán, que inclúe unha quincena de accións. Destacan proxectos piloto en barrios para fomentar o idioma entre familias, campañas de sensibilización en empresas e administracións, e a iniciativa "Al barri en català" para implicar o tecido económico e social. Tamén se creará unha web informativa sobre cursos de catalán e un grupo de mocidade referente na promoción da lingua.

Fonte: SEGRE

A Deputación Foral de Biscaia aprobou o Plan de normalización do uso do éuscaro 2023-2027, que busca incrementar o emprego da lingua tanto na xestión interna como nos servizos á cidadanía. Baseado no modelo KEMEN, o plan estrutúrase en dous eixes: xestión e uso, con medidas específicas para mellorar a presenza do éuscaro en comunicacións, relacións institucionais e atención ao público.

Fonte: Bizkaiko Foru Aldundia

O Concello de Barakaldo presenta o seu novo Plan estratéxico do éuscaro, que busca garantir os dereitos lingüísticos da cidadanía e fortalecer a presenza da lingua en todos os ámbitos. Elaborado con achegas de diversos axentes sociais, aposta por unha política lingüística inclusiva e adaptada á diversidade local. O plan estrutúrase en cinco eixes estratéxicos e inclúe accións como a creación dunha Comisión de Éuscaro, a formación de profesionais e campañas de sensibilización para impulsar o uso da lingua.

Fonte: EnBarakaldo

A asociación Salut pel Català puxo en marcha un programa de acollida lingüística e cultural para os 125 residentes de primeiro ano do Hospital Clínic de Barcelona, co obxectivo de facilitar a súa integración e sensibilizalos sobre a realidade lingüística do país. A iniciativa, que inclúe cursos de catalán, parellas lingüísticas e actividades culturais, busca garantir o dereito dos pacientes a seren atendidos na súa lingua. Esta proba piloto podería estenderse a outros hospitais no futuro.

Fonte: VilaWeb