España
Apenas o 20 % da mocidade balear escolle o catalán como lingua materna
A Primeira Enquisa da Xuventude en Baleares revela que só o 20,4 % da mocidade considera o catalán como lingua materna, fronte ao 47 % que opta polo castelán. Ademais, un número significativo de mozas e mozos elixe outros idiomas ou combinacións lingüísticas, unha situación máis frecuente que noutros territorios catalanófonos. O estudo, baseado en 2356 persoas de entre 15 e 34 anos, destaca que o uso do catalán diminúe a partir dos 20 anos e que se reduce ao 17,2 % entre os 30 e 34 anos.
Fonte: Última Hora
Comeza a tradución ao catalán do servizo de mensaxes instantáneas de Facebook
Meta está comezando a incorporar o catalán en Messenger, dispoñible en versión de escritorio e Android, pero aínda non en iOS. A Plataforma per la Llengua cualifica este avance de modesto e reclama que Instagram e Threads tamén ofrezan soporte para esta lingua. A entidade destaca a sorprendente exclusión do catalán en redes sociais populares, a pesar de estar presente en Facebook desde 2008 e WhatsApp desde 2012.
Fonte: El Món
A Universidade Rovira i Virgili presenta un espazo informativo sobre dereitos lingüísticos
A Universidade Rovira i Virgili (URV) inaugurou un Punto de Dereitos Lingüísticos no Campus Catalunya, consistente nun panel con acceso mediante código QR á información sobre estes dereitos. O obxectivo é divulgar os recursos e as accións relacionados coa política lingüística da institución.
Fonte: Diari Més
Publícase a versión en catalán de dúas novas normas UNE-ISO
O Centro de Terminoloxía TERMCAT publicou a versión en catalán das normas UNE-EN ISO/IEC 27000:2021 e UNE-EN ISO/IEC 27001:2023, relativas á xestión da seguridade da información. A norma 27000 define conceptos básicos deste ámbito, mentres que a 27001 establece requisitos para implementar un sistema de xestión de seguridade. Ademais, tamén se traduciu a emenda sobre accións climáticas.
Fonte: Generalitat de Catalunya
O Concello de Pamplona presenta o borrador do seu futuro plan para fomentar e protexer o éuscaro
O Concello de Pamplona presentou o borrador do futuro plan de normalización lingüística, que busca promover o uso do éuscaro na administración e nas relacións coa cidadanía. O documento subliña a responsabilidade institucional de protexer esta lingua e inclúe compromisos para fomentar a aprendizaxe, aumentar o seu prestixio social e asegurar recursos suficientes para a súa implementación. Entre os seus obxectivos figura a creación do Consello Municipal do Éuscaro para supervisar e avaliar as accións.
Fonte: Iruñeko Udala
Unha xornada analiza o impulso do catalán como eixe das políticas municipais dos concellos de Cataluña
A Primeira Xornada sobre Política Lingüística nos Municipios abordou as estratexias para reforzar o uso do catalán a nivel local. O conselleiro F. Xavier Vila destacou o papel dos concellos como espazos clave de socialización e propuxo medidas como a creación de plans municipais e incentivos fiscais para fomentar a lingua.
Fonte: Generalitat de Catalunya
O Concello de l’Eliana fai balance do seu programa de actividades para promover o valenciano no ano 2024
O Concello de l’Eliana reforzou en 2024 a promoción do valenciano a través de formación municipal, concertos infantís, repartición de libros e campañas nas redes sociais. Máis de 4000 persoas participaron nestas actividades que contribuíron á consolidación do valenciano como lingua de uso habitual e cultural no municipio.
Fonte: Ajuntament de l'Eliana
A Real Academia da Lingua Vasca actualiza o seu dicionario con 795 novas formas
O dicionario da Real Academia da Lingua Vasca (Euskaltzaindia) incorporou 795 novas formas en éuscaro, con termos culinarios como ajoarriero, guakamole e entsalada errusiar, e conceptos modernos como reggaeton ou ziborg. Desde 2016, as actualizacións son semestrais e nelas revísanse e mellóranse as entradas existentes. O traballo recente incluíu revisións baseadas en corpus especializados e un novo buscador para facilitar consultas. O dicionario conta agora con 51 407 formas e 69 364 acepcións.
Fonte: El Diario
Apróbase o Pacto de Figueres polo catalán
O Concello de Figueres impulsará o Pacto de Figueres polo catalán para garantir o desenvolvemento desta lingua na cidade. Este compromiso busca frear o retroceso do uso social do catalán e promover o seu cumprimento en sectores como o comercio, a sanidade e a xustiza.
Fonte: Ajuntament de Figueres
O Goberno vasco e Euskaltzaindia colaborarán en programas para o impulso do éuscaro
O Departamento de Educación do Goberno vasco e Euskaltzaindia reforzan a súa colaboración para impulsar o éuscaro mediante o programa EIMA, destinado á creación e difusión de materiais didácticos nesta lingua. O acordo inclúe a aplicación das normas de Euskaltzaindia, a coordinación de iniciativas e a promoción dun sistema educativo plurilingüe centrado no éuscaro.
Fonte: Gobierno Vasco
Boletín
Subscríbase ao boletín
