O Goberno de Navarra e Euskaltzaindia asinaron un acordo bilateral para impulsar o desenvolvemento do éuscaro na Comunidade Foral, que se concreta en accións como a recuperación de gravacións lingüísticas, a elaboración de dicionarios e a creación dunha biblioteca específica. Este convenio, que lle outorga a Navarra plena capacidade de decisión e mellor coordinación, establece a creación de comisións para garantir o seguimento, planificación e avaliación das accións previstas.

Fonte: Gobierno de Navarra

A Academia da Lingua Asturiana presenta Noyos, un novo método de alfabetización en asturiano dirixido a persoas adultas, baseado no Marco Común Europeo de Referencia para as Linguas. O proxecto abrangue todos os niveis de competencia e combina un manual impreso cunha plataforma dixital con recursos audiovisuais e exercicios para a autoaprendizaxe.

Fonte: Academia de la Llingua Asturiana

O Goberno vasco puxo en marcha o proxecto LANERA para promover o uso do éuscaro no ámbito laboral e socioeconómico, un sector clave para a súa normalización. A iniciativa, estruturada en cinco fases ata 2026, comeza cunha recolla de información nos 252 municipios da CAPV para identificar iniciativas en curso e establecer prioridades comúns. O obxectivo é facer do éuscaro unha ferramenta real de traballo que xere novas oportunidades.

Fonte: Gobierno Vasco

Mercedes Jaime, profesora da Universidade de Zaragoza, publica un dicionario de terminoloxía veterinaria inglés-español, resultado de trinta anos de traballo e orientado tanto ao ámbito académico como profesional. A obra abrangue todas as especialidades da medicina veterinaria e está deseñada para facilitar a comprensión, redacción e tradución de textos técnicos. Publicado inicialmente en formato impreso, prevese o seu acceso en liña para ampliar o seu uso entre diversos perfís científicos e técnicos.

Fonte: Fundéu

O Departamento de Política Lingüística abriu unha nova liña de axudas, dotada con 150 000 euros, para apoiar a incorporación do catalán nos xogos de mesa. As subvencións, que poden cubrir ata o 80 % do proxecto, establecen dúas modalidades: primeira edición en catalán de xogos de mesa en edición independente ou xogos de mesa multilingües que incorporan o catalán por vez primeira.

Fonte: Generalitat de Catalunuya

O Premio Memoria Escolar Rural, organizado en Fonfría coa colaboración da Universidade de Salamanca, pon este ano o foco na lingua mirandesa. A iniciativa busca recoller relatos de experiencias escolares no ámbito rural, escritos en mirandés, co obxectivo de conservar a memoria educativa e reforzar a visibilidade desta lingua minorizada no contexto ibérico.

Fonte: Rádio Brigantia

O Consello de Goberno aprobou unha convocatoria de subvencións por valor de 1.116.400 euros para apoiar o desenvolvemento de longametraxes, series e miniseries ata 2026, con especial atención aos proxectos en éuscaro. As axudas cubrirán gastos previos á produción, como guión, márketing, localizacións ou asesoramento xurídico. A contía máxima variará segundo o formato, xénero e lingua, e será maior para as producións en éuscaro.

Fonte: Gobierno Vasco

O uso do éuscaro nas redes sociais entre a mocidade de 15 a 29 anos aumentou ata o 43,6 % en 2025, cunha maior presenza entre as mulleres. Guipúscoa lidera esta tendencia con máis da metade da mocidade empregando a lingua, mentres que Biscaia e Áraba tamén experimentan subas significativas. Os datos, recollidos polo Observatorio Vasco da Xuventude, revelan un avance sostido cara á normalización do éuscaro nos espazos dixitais.

Fonte: Gobierno Vasco

A FESOCA e as entidades afiliadas manifestaron o seu malestar polo feito de que o Goberno catalán non incluíse a lingua de signos catalá no Pacto Nacional pola Lingua. Consideran esta exclusión unha grave falta de compromiso coa diversidade lingüística e reclaman un pacto específico que recoñeza e protexa os dereitos das persoas xordas e xordocegas, así como o valor cultural desta lingua minorizada.

Fonte: Diari de la Llengua

As Xuntas Xerais de Araba aprobaron unha moción para ampliar as axudas ás empresas que faciliten prácticas de FP Dual en éuscaro. A proposta busca garantir que o alumnado poida completar a súa formación nesta lingua tamén no ámbito laboral.

Fonte: Radio Llodio