Os Bolechas, a serie infantil en galego máis exitosa da televisión, dará o salto a Asturias. A Televisión do Principado de Asturias emitirá este programa en lingua asturiana. Vacaloria Producións está a traballar na dobraxe do programa e a dirección do ente público de comunicación de Asturias anunciará en datas próximas a súa emisión.

Fonte: Galicia Confidencial

Presentouse a campaña “Linkedin en catalán” que reclama que esta rede social vinculada ao mundo profesional teña a súa versión en catalán. A campaña, impulsada pola Fundación puntCAT, pide que Linkedin, que está dispoñible en 42 linguas, incorpore tamén o catalán.

Fonte: El Periódico

O Goberno vasco desenvolveu unha nova aplicación para poder acceder a través dos dispositivos móbiles ao Banco Terminolóxico Público Vasco, Euskalterm. Esta é unha ferramenta con termos especializados de informática, economía, administración e dereito, e inclúe definicións e a tradución desas palabras en éuscaro a outras linguas.

Fonte: ABC

A conselleira de Educación, Cultura e Universidades, Joana Maria Camps, destacou a obxectividade dos resultados das probas de diagnóstico que apuntan a unha mellora xeneralizada das competencias lingüísticas en inglés, castelán e catalán en Primaria.

Fonte: Diario de Mallorca

A actual situación económica e laboral que atravesa España fixo que aumente de forma extraordinaria a preocupación de miles de pais pola formación idiomática dos seus fillos, segundo un estudo realizado por Pueblo Inglés-Diverbo sobre máis de 1500 enquisados de todo o país. O inglés converteuse na materia máis importante para os pais. Nunha escala do 1 ao 4, un 86 % dos enquisados dálle maior prioridade ao idioma por diante das matemáticas, lingua ou coñecemento do medio.

Fonte: Madrid Diario

Dúas resolucións ditadas no prazo de apenas vinte días polo Tribunal Administrativo de Navarra volven revelar que o equipo de Goberno de UPN no Concello de Pamplona incumpre de forma reiterada e case consciente a súa propia normativa sobre o éuscaro, aprobada en 1997 baixo a denominación formal de Ordenanza Reguladora da Utilización e Fomento do Éuscaro.

Fonte: Noticias de Navarra

Softcatalà presentou a versión 2.4 do catalanizador, unha ferramenta para simplificar a catalanización de calquera sistema Microsoft Windows ou Mac OS X para que o usuario poida traballar en catalán. A tal efecto o programa aplica cambios de configuración, os paquetes de idioma e os correctores ortográficos necesarios. Desde a súa presentación en 2012, máis de 80 000 usuarios o utilizaron.

Fonte: Generalitat de Cataluña

O Concello de Barrika atópase en pleno proceso de creación do novo Plan de éuscaro que rexerá o tratamento da lingua na localidade. Para facer deste documento unha folla de ruta máis completa e próxima á cidadanía, o Consistorio quere recoller as sensacións e suxestións dos veciños do municipio.

Fonte: Deia

Co fin de ofrecer un punto de unión os mestres de aragonés que desenvolven a súa actividade docente no ensino regulado de Educación Infantil e Primaria creouse a asociación Mestres de Aragonés. Esta asociación pretende defender os dereitos laborais así como potenciar a mellora das condicións profesionais deste colectivo.

Fonte: Aragón Digital

Jordi Portabella, membro de Esquerra Republicana de Cataluña, preguntoulle ao goberno do Concello de Barcelona cantas familias solicitaron ao Consorcio de Educación de Barcelona que os seus fillos sexan escolarizados en castelán e a porcentaxe que representan. O concelleiro de educación, Gerard Ardanuy, explicouno: 16 solicitudes sobre o total de 176 000 alumnos, un 0,009 %.

Fonte: La Vanguardia