España
A Universidade do País Vasco aproba o IV Plan director de éuscaro
A Universidade do País Vasco aprobou un novo plan de éuscaro, que estará vixente ata 2027. Os obxectivos principais inclúen o impulso do éuscaro na oferta de posgraos, o uso social da lingua e a dixitalización. Este plan estrutúrase en catro eixes: formación, investigación e transferencia, cultura e sociedade, e persoas.
Fonte: UPV/EHU
O Goberno de Navarra asina un convenio con Eusko Ikaskuntza para o impulso e a promoción do éuscaro
Este convenio de colaboración conta cunha partida orzamentaria de 65 000 euros. O acordo financiará actividades de impulso, estudo e investigación do éuscaro, e analizará valores compartidos sobre a súa promoción entre a cidadanía de Navarra.
Fonte: Gobierno de Navarra
Un 56 % das buscas en Google ofrece resultados en catalán grazas a un cambio no algoritmo
A presenza do catalán nas buscas de Google aumentou significativamente e alcanzou o 56% das buscas nesta lingua. Isto foi consecuencia dun cambio de algoritmo aplicado por Google en agosto de 2023, que mellorou a interpretación das intencións das persoas usuarias.
Fonte: Diari de la Llengua
O Concello de Bilbao organiza unha sesión participativa como parte do diagnóstico sobre a situación do éuscaro na cidade
O Concello de Bilbao está a finalizar o diagnóstico sobre a situación do éuscaro na cidade cun proceso participativo este mes de xuño. Tras aprobar en 2014 o Plan de Acción para a Promoción do Éuscaro (ESEP), agora busca definir retos e liñas estratéxicas futuras. O proceso culminará cunha sesión de participación cidadá e unha enquisa en liña para recoller opinións e suxestións da veciñanza.
Fonte: Ayuntamiento de Bilbao
O centro tecnolóxico Neiker premia o mellor artigo divulgativo en éuscaro sobre o sector primario
O centro tecnolóxico Neiker premiará por noveno ano consecutivo a divulgación científica do primeiro sector nos Premios CAF-Elhuyar. Co lema "konta(kta)tu", anímase a profesionais e afeccionados a compartir os seus coñecementos en éuscaro.
Fonte: Gobierno Vasco
Reclaman medidas de accesibilidade lingüística para que as persoas xordas poidan usar a lingua de signos
A Confederación Estatal de Persoas Xordas (CNSE) pediu medidas de accesibilidade lingüística para que as persoas xordas poidan usar libremente a lingua de signos, recibir educación e ser atendidas nela.
Fonte: Siglo XXI
O Goberno vasco traballa para conseguir a oficialidade do éuscaro na UE
O Goberno vasco avanza na oficialización do éuscaro na Unión Europea, enviando un informe sobre a situación do idioma e solicitando que o IATE se vincule co banco de datos terminolóxicos Euskalterm. Esta solicitude foi acompañada de cartas a autoridades españolas e europeas detallando a capacidade do éuscaro para cumprir os compromisos da oficialidade.
Fonte: Gobierno Vasco
Segundo un estudo, o uso do catalán diminúe na cidade de Barcelona
Un estudo da Enquisa de Servizos Municipais de Barcelona de 2023 revela que o uso do catalán na cidade caeu ao 36,5 %, unha porcentaxe semellante ao 36,1 % do total de Cataluña, segundo a Enquisa de Usos Lingüísticos de 2018. O uso do catalán descendeu progresivamente desde o 49 % en 1989 ata o 37 % en 2023.
Fonte: Diari de la Llengua
As universidades alertan do risco que pode supor a nova lei educativa para o valenciano
A Xarxa Vives, que agrupa 22 universidades do dominio lingüístico catalán, alertou do risco que pode supor a proposición de lei educativa para o valenciano.
Fonte: Diari de la Llengua
A Sociedade Informática do Goberno vasco recibe un premio polo seu labor no desenvolvemento do tradutor neuronal Itzuli
Este galardón internacional que outorga Red Hat recoñece o seu labor no desenvolvemento do proxecto de tradutor neuronal Itzuli.
Fonte: Gobierno Vasco
Boletín
Subscríbase ao boletín
