España
Unha campaña reivindica a diversidade da lingua catalá
O festival "Posa-hi tu l'accent" celebra as variantes dialectais do catalán cunha campaña en redes sociais que reivindica a diversidade e unidade da lingua.
Fonte: Diari de la Llengua
Convócase por segunda vez o premio Kiroletik Bagoaz Euskaraz para recoñecer boas prácticas que fomenten o éuscaro no deporte
O Goberno vasco convoca por segunda vez o premio Kiroletik Bagoaz Euskaraz, destinado a recoñecer boas prácticas que fomenten o uso do éuscaro no deporte. O galardón premia persoas, asociacións ou grupos que traballen pola normalización do éuscaro neste ámbito.
Fonte: Gobierno Vasco
O Concello de Errentería anima a cidadanía a dirixirse en éuscaro ao consistorio
O Concello de Errenteria aprobou as directrices para o uso do éuscaro e o castelán no período 2023-2027 e quere fomentar o uso do éuscaro en comunicacións cidadás e trámites administrativos.
Fonte: Errenteria Udala
O Goberno de Navarra convoca cinco prazas de tradutor de éuscaro
O Goberno de Navarra abriu unha convocatoria para cubrir cinco prazas de tradutor/a de éuscaro mediante oposición, destinadas á Administración da Comunidade Foral e aos seus organismos autónomos. Dúas prazas son de libre concorrencia e tres están reservadas para funcionarios con cinco anos de antigüidade.
Fonte: Navarra Norte
O Concello de Donostia organiza catro propostas para impulsar o coñecemento e o uso do éuscaro
O Servizo de Éuscaro lanzou catro programas para fomentar o coñecemento e o uso do éuscaro entre a infancia e a mocidade nos que participarán preto de 1000 menores.
Fonte: DonostiTik
Publícase por primeira vez nunha revista científica o resumo dun artigo en catalán
Por primeira vez, unha revista científica internacional, Nature Communications, publicou o resumo e sumario dun artigo en catalán. O estudo, liderado polo Centro de Regulación Xenómica, presenta unha nova metodoloxía para identificar e caracterizar xenes mediante a análise de secuencias de ARN. Este feito representa un fito histórico para a lingua e a ciencia catalás.
Fonte: Ara
Propoñen unha campaña para fomentar os dereitos lingüísticos no ámbito sanitario balear
A Plataforma per la Llengua propón unha campaña para promover os dereitos lingüísticos no ámbito da saúde, dirixida a pacientes e profesionais sanitarios, unha proposta considerada como positiva polo Goberno balear.
Fonte: Última Hora
Un total de 104 modelos de coche xa ofrece un manual de uso en catalán
Dez marcas de automóbiles ofrecen agora manuais de usuario en liña en catalán, co que se incrementou a cifra de 18 modelos en 2019 a 104 en 2024. A Generalitat de Cataluña está a traballar para ampliar a oferta nesta lingua nos produtos e servizos do sector do automóbil.
Fonte: Generalitat de Catalunya
O Censo de entidades de fomento da lingua catalá increméntase ata alcanzar as 361
O Censo de entidades de fomento da lingua catalá alcanzou este ano as 361 entidades, co que duplica o crecemento medio dos últimos anos. Das 361, 200 son do ámbito cultural; 46 de integración social; 42 do ámbito profesional, laboral e empresarial; 36 de mocidade, lecer e deporte; 23 de fomento da lingua; e 13 de ciencia e tecnoloxía.
Fonte: Generalitat de Catalunya
A Universidade de Lleida aproba o seu novo Plan de linguas 2024-2026
O Consello de Goberno da Universidade de Lleida (UdL) aprobou o Plan de linguas 2024-2026, para reforzar o catalán como lingua oficial e institucional, fomentar o uso das linguas oficiais en Cataluña e promover o plurilingüismo na comunidade universitaria. O plan inclúe accións como axudas para materiais docentes en catalán, a publicación de webs institucionais en occitano e a incorporación da lingua de signos en actos institucionais.
Fonte: Universitat de Lleida
Boletín
Subscríbase ao boletín
