España
Os concellos de Navarra poderán ter unha denominación bilingüe en éuscaro e castelán
A conselleira de Relacións Cidadás e Institucionais, Ana Ollo, manifestou que o decreto sobre denominacións bilingües concederalles aos concellos a liberdade de engadir o seu nome en éuscaro, sempre que Euskaltzaindia o recoñeza.
Fonte: Noticias de Navarra
As Escolas Oficiais de Idiomas de Aragón incluirán o aragonés na súa oferta
No Boletín Oficial de Aragón (BOA) anunciouse que as Escolas Oficiais de Idiomas da comunidade engadirán a ensinanza e avaliación do aragonés á súa oferta a partir do seguinte curso.
Fonte: El Periódico de Aragón
Euskarabidea achegará 60 000 euros para promover o uso do éuscaro en centros de traballo do sector privado
Euskarabidea vén de publicar unha convocatoria de axudas para promover o uso do éuscaro en centros privados de traballo da Comunidade Foral de Navarra, ás que se destinan un total de 60 000 euros. Cómpre mencionar que é a primeira vez que se convocan este tipo de subvencións.
Fonte: El Diario Vasco
EiTB e o Departamento de Cultura e Política Lingüística do Goberno vasco impulsan unha campaña para promover o uso do éuscaro
A campaña, impulsada por EiTB e o Departamento de Cultura e Política Lingüística do Goberno vasco, denomínase 'Bihotzetik ezpainetara' e pretende promover o uso do éuscaro entre a poboación máis nova do País Vasco. Para acadar este obxectivo, a campaña céntrase na serie 'Go!azen', que se converteu nun auténtico fenómeno social.
Fonte: euskadi.eus
O Bierzo celebra o bicentenario do escritor Antonio Fernández Morales
O secretario xeral de Política Lingüística, Valentín García, participou
en Cacabelos (León) nos actos de homenaxe ao escritor berciano Antonio Fernández Morales no bicentenario do seu nacemento.
Fonte: O Portal da Lingua Galega
Artistas do ámbito musical de Asturias xúntanse un ano máis para pedir a oficialidade do asturiano
Artistas do eido musical de Asturias reuníronse, por vixésimo noveno ano consecutivo, para reivindicar os dereitos lingüísticos da cidadanía asturiana. En concreto, organizáronse xogos para nenos e nenas, presentouse o cantar de 'Reciella. Families pol Asturianu' e celebrouse o XXIX Concerto pola Oficialidade.
Fonte: Asturies.com
O proxecto de corpus da lingua de signos española preséntase en Madrid
Este proxecto ten como finalidade proporcionarlles aos investigadores, docentes e persoas interesadas recursos para a investigación lingüística e a formación.
Fonte: El Periódico
Euskaltzaindia e o Goberno de Navarra renovan o seu convenio de colaboración para o ano 2017
O Goberno de Navarra e Euskaltzaindia veñen de renovar o convenio de colaboración para realizar diversos proxectos culturais durante este ano 2017. Neste acordo recóllense as bases da colaboración e os compromisos que asumen ambas as dúas institucións.
Fonte: 20minutos
A Deputación de Biscaia e a Asociación de Clubs de Traiñeiras chegan a un acordo para fomentar o uso do éuscaro
A Deputación Foral de Biscaia e a Asociación de Clubs de Traiñeiras (ACT) chegaron a un acordo e asinaron un convenio que apoiará o proxecto 'Euskararen Txantxangorria', que ten o obxectivo de fomentar o uso do éuscaro na maior competición de remo en banco fixo, a Eusko Label Liga.
Fonte: ABC Agencias
País Vasco, Navarra e Iparralde asinarán un acordo para promover o uso do éuscaro
Os gobernos do País Vasco e Navarra, xunto co Organismo Público do Éuscaro de Iparralde, asinarán un convenio para promover o éuscaro, que recolle que a colaboración se levará a cabo en eidos como a educación e a capacidade lingüística, a investigación sociolingüística ou en áreas para desenvolver a política lingüística no ámbito europeo.
Fonte: Expansión
Boletín
Subscríbase ao boletín
