España
O número de estudantes de aragonés aumenta un 25 % respecto ao curso anterior
O número de alumnos/as que estuda aragonés pasou de 625 no curso anterior a 782 no actual, o que supón un incremento do 25 %.
Fonte: El Periódico de Aragón
O Instituto Ramon Llul e o FC Barcelona colaborarán na proxección exterior do catalán
Ambas as entidades renovaron o acordo de colaboración que ten como obxectivo o desenvolvemento de actividades conxuntas destinadas á proxección exterior da lingua e da cultura catalás.
Fonte: Generalitat de Catalunya
Os equipos de Portugalete únense para fomentar o uso do éuscaro nas actividades deportivas
Os equipos deportivos da localidade subscribiron un convenio para aumentar o uso do éuscaro nas sesións de adestramento, nos partidos etc. co apoio do Concello.
Fonte: En Portugalete
Segundo un estudo, o cerebro bilingüe le de maneira distinta en castelán, éuscaro ou inglés
Este estudo, realizado polo Basque Center on Cognition, Brain and Language (BCBL) de San Sebastián, conclúe que as redes neuronais que se activan son diferentes en función da lingua en que se le.
Fonte: Diario Vasco
A lingua asturiana xa é oficial en Noreña
Xa entrou en vigor en Noreña a ordenanza municipal de uso do asturiano despois de cumprir todos os trámites legais e o período de exposición pública durante o cal non se recibiu alegación ningunha.
Fonte: La Nueva España
O Goberno balear convoca cursos de catalán para nais e pais do alumnado de educación infantil, primaria e secundaria
Estes cursos teñen como obxectivo que pais e nais que non saben catalán adquiran coñecementos básicos desta lingua para comunicarse coas súas fillas e fillos e axudarlles na súa aprendizaxe.
Fonte: ABC
Crean unha base de datos sobre o cine producido en lingua vasca
A páxina web Ganbara permitirá acceder á información de máis de 200 películas, 400 profesionais e 50 empresas do sector que producen cine en éuscaro.
Fonte: Eitb
Un estudo recompilará a toponimia aragonesa de Huesca
Un estudo, encargado polo Concello de Huesca a un especialista en lingua aragonesa, recompilará a toponimia tradicional das súas rúas e barrios.
Fonte: El Periódico de Aragón
A Facultade de Dereito da Universidade de Valencia impulsará o uso do valenciano no ámbito xurídico
Un novo itinerario formativo da Facultade de Dereito, denominado "Jurista en valencià", busca que o valenciano se converta nunha ferramenta de comunicación no ámbito xurídico.
Fonte: Levante-EMV
Un informe insta a poñer en marcha unha planificación lingüística firme para o éuscaro no ámbito do tempo libre
O informe Gu gazteok revela que o castelán está moi presente no tempo libre da mocidade vasca, polo que cómpre mellorar a situación do éuscaro en actividades relacionadas co deporte, a cultura e o lecer.
Fonte: Noticias de Álava
Boletín
Subscríbase ao boletín
