Galicia
A Xunta reforza os lectorados da rede de centros de estudos galegos coa incorporación de nove docentes
O secretario xeral de Política Lingüística, Valentín García, recibiu no Pazo de San Roque, a sete dos nove lectores de lingua e cultura galegas que inician a súa actividade nos Centros de Estudos Galegos dependentes da Consellería de Cultura, Educación, FP e Universidades.
Fonte: O Portal da Lingua Galega
O galego figura entre as linguas presentes no Vocabulario panlatino do rugby
O Vocabulario panlatino do rugby – linguas romances e éuscaro é unha nova obra lexicográfica que inclúe as correspondencias léxicas en galego e outras oito linguas de máis de 200 termos relacionados con este deporte.
Fonte: Consello da Cultura Galega
A Real Academia Galega presenta nun congreso na Coruña o proxecto ‘Modo galego, actívao’
A Real Academia Galega presentou no XVI Congreso Internacional de Antropoloxía, que se celebrou na Coruña, o proceso de deseño e posta en marcha de ‘Modo galego, actívao’, un proxecto para desenvolver accións de dinamización lingüística en espazos comunicativos fóra das aulas.
Fonte: Real Academia Galega
Fanse públicas as empresas galardoadas polo seu emprego do galego nos Premios Bacelos de Prata
Os Premios Bacelos de Prata, que entrega a Asociación Álvaro das Casas, teñen como obxectivo recoñecer o labor de empresas que apostan polo galego na etiquetaxe dos seus produtos. As entidades galardoadas nesta edición de 2023 son as seguintes: a Adega Tapias Mariñán e a sociedade de gandeiros galegos Leite Noso.
Fonte: Consello da Cultura Galega
A rede de escolas Semente presenta un documental sobre o ensino en lingua galega
O documental Aprender na língua própria. Das Escolas de Ensino Galego à Semente, producido por Aqueladas S. Cooperativa e cofinanciado pola Deputación da Coruña, afonda na historia do ensino en inmersión en lingua galega, desde os tempos das Irmandades da Fala até hoxe.
Fonte: Nós Diario
Falece Dorothé Schubarth, autora do "Cancioneiro popular galego"
Falece aos 80 anos a etnomusicóloga suíza Dorothé Schubarth, figura fundamental na recuperación e difusión do patrimonio musical de Galicia. Foi autora do Cancioneiro popular galego coa axuda do filólogo Antón Santamarina.
Fonte: Nós Diario
A Xunta visibiliza en Alemaña a obra de grandes escritoras galegas de diferentes épocas, desde Pardo Bazán a Luz Pozo Garza
O secretario xeral de Política Lingüística, Valentín García, participou na presentación de Voces da terra. Seis poetas galegas e Erzählungen (1823-1920), dous volumes coordinados por Javier Gómez-Montero, responsable do Centro de Estudos Galegos da Xunta en Kiel (Alemaña).
Fonte: O Portal da Lingua Galega
Convócase o VI Premio de Literatura Infantil Carlos Mosteiro para promover novos autores e autoras en lingua galega
Este galardón ten como obxectivos a promoción de novos autores e autoras en lingua galega de literatura infantil e a homenaxe ao veciño do concello da Pobra do Caramiñal Xosé Carlos Mosteiro Fraga.
Fonte: Editorial Galaxia
Lourenzá acolle un curso sobre Fernández del Riego co apoio da Xunta
O secretario xeral de Política Lingüística, Valentín García, participou na inauguración do curso «Francisco Fernández del Riego na cultura galega do século XX», impulsado pola Real Academia Galega (RAG), a Universidade de Santiago de Compostela (USC) e o Concello de Lourenzá co apoio da Xunta de Galicia, entre outras entidades.
Fonte: O Portal da Lingua Galega
A Xunta convoca novas probas Celga para os niveis 2, 3 e 4 na segunda quincena de novembro
A Xunta de Galicia publica no Diario Oficial de Galicia (DOG) e no Portal da Lingua Galega a convocatoria para inscribirse nas probas que permiten obter os certificados oficiais que acreditan o coñecemento da lingua galega.
Fonte: O Portal da Lingua Galega
Boletín
Subscríbase ao boletín
