Galicia
A Asociación PuntoGal e a Coordinadora de Traballadores/as de Normalización da Lingua asinan un convenio para promover os produtos en galego
Ambas as entidades asinaron un convenio de colaboración para traballar de maneira conxunta na promoción de produtos en galego a través do proxecto Agasallo. Ao abeiro deste acordo seleccionaranse mensualmente varios produtos que se sortearán nas redes sociais.
Fonte: CTNL
A Xunta conmemora o Día Mundial da Poesía coa lingua e a cultura galegas como eixe central
A Xunta de Galicia celebra, como cada 21 de marzo, o Día Mundial da Poesía poñendo como eixe a lingua e a cultura galegas nos actos nos que participan o secretario xeral de Política Lingüística, Valentín García, no Carballiño (Ourense), e o director xeral de Cultura, Anxo M. Lorenzo, en Vigo.
Fonte: O Portal da Lingua Galega
O Concello de Carballo pon en marcha unha iniciativa de promoción do galego no sector hostaleiro
Esta iniciativa, coa que colabora a Asociación de Hostalería de Carballo, consistirá na repartición de gardamanteis con pasatempos da revista A Píllara durante a Semana Santa co obxectivo de que a clientela se entreteña facendo unha sopa de letras ou un anagrama en galego.
Fonte: Concello de Carballo
A Mesa pola Normalización Lingüística elabora un informe sobre a presenza do galego nos centros de secundaria
Para a elaboración deste informe, recolléronse datos de 303 institutos públicos que mostran que máis da metade non ten plan lingüístico ou que a presenza do galego nos libros e materiais empregados é moito menor ca a do castelán.
Fonte: Consello da Cultura Galega
O Concello da Coruña impulsa un programa de fomento do galego nas escolas infantís municipais
O programa de fomento do galego na Rede de Escolas Infantís Municipais da Coruña ten como obxectivo proporcionar recursos lúdicos e educativos nesta lingua e promover a galeguización na etapa educativa de 0 a 3 anos.
Fonte: Consello da Cultura Galega
A Universidade de Santiago de Compostela presenta os datos sobre os usos lingüísticos docentes no curso 2022-2023
Os datos mostran que na actualidade se imparten en castelán o 71,6 % das horas docentes; en galego, o 24,4 %; e noutras linguas, o 4 %, cifras case idénticas ás do curso 2021-2022.
Fonte: Consello da Cultura Galega
A Xunta destina 350 000 euros á promoción da lingua galega nas entidades locais
A Xunta destina este ano 350 000 euros ás entidades locais de Galicia para a promoción do uso da lingua galega. O Diario Oficial de Galicia (DOG) convocou estas subvencións, dirixidas aos concellos galegos e agrupacións destes que superen os 3000 habitantes.
Fonte: O Portal da Lingua Galega
O programa de dinamización lingüística FalaRedes arranca a súa XII edición coa obra “Castelao”, que potencia a mirada feminina nas montaxes teatrais
Como cada ano a Xunta de Galicia bota a andar o programa de dinamización lingüística FalaRedes, pensado para encher o tempo de lecer con actividades en galego entre os máis de 200 concellos e agrupacións pertencentes á Rede de Dinamización Lingüística.
Fonte: O Portal da Lingua Galega
A Real Academia Galega publica un novo número da colección Terra Nomeada dedicado á toponimia de Ribeira
Fernando Cabeza Quiles é o autor de Toponimia de Ribeira, dispoñible xa na versión en liña na web da RAG. Neste volume aborda a orixe e o significado dos nomes das entidades de poboación deste concello coruñés.
Fonte: Real Academia Galega
A Deputación de Pontevedra convoca cursos de perfil lingüístico para persoal da Administración local
Ao abeiro do Plan agrupado de formación continua para o ano 2023, organiza os seguintes cursos destinados ao persoal ao servizo da Deputación de Pontevedra, así como ao persoal dos concellos da provincia adheridos a este plan: "Linguaxe administrativa galega. Nivel medio", "Curso de linguaxe clara", "A dinamización lingüística na Administración local" e "Linguaxe e estilo administrativo. Técnicas para mellorar a redacción".
Fonte: Consello da Cultura Galega
Boletín
Subscríbase ao boletín
