O secretario xeral da Lingua, Valentín García, incidiu no compromiso da Xunta “con fomentar a presenza dixital do galego, incorporándoo ás novas linguaxes e favorecendo o seu uso nas plataformas tecnolóxicas, un eido no que estamos dando grandes pasos”. Fíxoo durante a xornada Tecnoloxía en galego. Resultados de ILENIA-Proxecto Nós, celebrada en Santiago e na que se expuxeron os resultados deste proxecto posto en marcha polo Goberno autonómico en colaboración coa universidade compostelá.

Fonte: O Portal da Lingua Galega

A décima edición do certame de subtitulación ao galego de vídeos TED de divulgación científica deu a coñecer os nomes das persoas gañadoras que recibirán 300 euros e un diploma honorífico. O certame busca promover o uso do galego na divulgación científica e aumentar os recursos audiovisuais nesta lingua.

Fonte: Universidade de Santiago de Compostela

A campaña «Galego a pé de barrio», impulsada polo alumnado de 1º de Bacharelato, busca promover o uso do galego no comercio local do barrio de Fontiñas. Este proxecto xorde tras a reflexión sobre os baixos índices de uso do galego no instituto, observados a través dunha enquisa interna, e busca cambiar os hábitos lingüísticos no contorno máis próximo. Con este obxectivo, Fontiñas convértese no primeiro barrio piloto dunha iniciativa que pretende crear espazos seguros para o uso do galego no comercio, combater a diglosia e reforzar a identidade lingüística local.

Fonte: Diario de Compostela

Recuncho Gamer presentou Xogalego, un catálogo para facilitar os videoxogos en galego e para darlle visibilidade ao traballo de estudos e creadoras e creadores que os desenvolven, ante as eivas das grandes plataformas para localizalos. A ferramenta arrinca con noventa títulos e prevé medrar axiña ata arredor de 200, co apoio da Deputación da Coruña. Cada entrada inclúe datos como autoría, ano, plataformas, xénero, idades recomendadas, linguas dispoñibles e ligazóns oficiais. O proxecto completarase con accións divulgativas en liña e nos centros educativos.

Fonte: Culturagalega

O conselleiro de Cultura, Lingua e Xuventude, José López Campos, celebrou a decisión do Parlamento de Galicia, coa unanimidade de todos os grupos, de declarar o 2026 Ano Oteriano, con motivo de cumprirse o cincuenta aniversario do pasamento desta “figura esencial das letras, o pensamento e identidade galega contemporánea”, así como tamén o centenario da publicación de Guía de Galicia, unha das súas grandes obras.

Fonte: O Portal da Lingua Galega

A Xunta de Galicia aprobará convenios coa Sorbona e coa Universidade de São Paulo para impulsar o ensino e a difusión da lingua e da cultura galegas no exterior entre 2026 e 2028, cun investimento superior aos 120 000 euros. Os acordos permitirán integrar estas materias nos plans de estudo, garantir lectorados e organizar actividades académicas e culturais. Esta iniciativa inscríbese na estratexia de internacionalización do galego, que xa conta con milleiros de estudantes en universidades e entidades de diversos países.

Fonte: Crónicas de la Emigración

A colección Terra Nomeada incorpora dous novos títulos dedicados á toponimia de Zas, Padrón e Pontecesures, elaborados por dous especialistas que nestas obras afondan na orixe e no significado dos nomes de parroquias, aldeas, concellos e accidentes xeográficos, con especial atención á recuperación das denominacións históricas. Ambas as publicacións contan con versión dixital accesible na web da RAG e contribúen á posta en valor do patrimonio toponímico galego.

Fonte: Real Academia Galega

O Concello do Carballiño impulsa unha campaña de Nadal que combina o apoio ao comercio local coa promoción do galego, mediante a distribución de adhesivos con mensaxes na lingua propia para envolver agasallos. A iniciativa procura integrar o galego en contextos cotiáns de grande visibilidade. Desde o goberno municipal destácase a utilidade da lingua como ferramenta moderna e ligada á actividade económica, ao tempo que se reforza o valor do comercio de proximidade.

Fonte: La Voz de Galicia

O secretario xeral da Lingua, Valentín García, e a directora xeral de Xuventude, Lara Meneses, recibiron os premiados na décimo cuarta edición do certame Lingua de Namorar, organizado polos dous departamentos da Xunta co obxectivo, explicaron, “de promover o uso do galego entre as persoas mozas, ao tempo que se fomenta o talento literario e a creatividade ao redor das relacións persoais”.

Fonte: O Portal da Lingua Galega

O proxecto «Papés d’emprenta condenada» culmina cun arquivo dixital que dá nova vida a un amplo corpus de textos galegos do Prerrexurdimento e permite continuar ampliándoo con novos materiais. A iniciativa, froito dun longo labor colectivo, documenta a intensa actividade escrita en galego entre finais do século XVIII e mediados do XIX e revela as preocupacións políticas, sociais e relixiosas da época. A dixitalización incorpora ferramentas de busca e análise que facilitan unha nova lectura dos documentos. O conxunto constitúe unha achega clave para comprender a historia cultural, lingüística e comunicativa da Galicia contemporánea.

Fonte: Consello da Cultura Galega