A Deputación da Coruña lanza unha nova edición da campaña «Un outono cheo de letras», co obxectivo de promover a lectura en galego e reforzar a súa presenza na sociedade. A iniciativa anima a cidadanía a descubrir a literatura galega, destacando o libro como motor de transformación cultural e identitaria.

Fonte: Deputación da Coruña

A campaña «O Nadal en galego, barrio a barrio», organizada pola Asociación de Empresarias de Lugo (AELU) coa colaboración da Xunta de Galicia, ten como obxectivo crear espazos de lecer en galego durante o Nadal.

Fonte: Consello da Cultura Galega

O certame Xuventude Crea 2025 premiou na categoría de música os proxectos Obsesión e Lembrar, de Martín Rodríguez, natural do concello pontevedrés de Vigo; Empatía, un idioma para entendelo todo e Son de Ourense, de Abraham Santiago Reboredo, do municipio ourensán do Carballiño; e Fantasía sobre Lela e Sonata n.º 48 en mi maior de Joseph Haydn, de Alba Raña, natural tamén da cidade olívica.

Fonte: O Portal da Lingua Galega

O secretario xeral da Lingua, Valentín García, participou na presentación de Memorias dun neno labrego, a nova produción do Centro Dramático Galego dirixida por Cándido Pazó coa que a Xunta de Galicia homenaxeará a partir de xaneiro a Xosé Neira Vilas polo 10 aniversario do seu pasamento.

Fonte: O Portal da Lingua Galega

A Real Academia Galega e a Fundación Barrié abren a votación popular para escoller a Palabra do Ano 2025 entre seis termos finalistas: desfeita, foliada, loia, lume, retrinco e xenocidio. As propostas, vinculadas a asuntos que marcaron a actualidade recente, combinan preocupación social (como a vulneración de dereitos humanos ou os incendios) con voces que evocan celebración e vitalidade. A participación está aberta no Portal das Palabras ata o 21 de decembro.

Fonte: Real Academia Galega

“Nadal en Outes” é o lema dos dous certames cuxo obxectivo é impulsar a creatividade, apoiar o comercio local e fomentar o galego: o Concurso de Decoración, no que se premiarán propostas decorativas orixinais para fachadas e escaparates e se valorará o uso desta lingua; e o Concurso de Postais, dirixido á infancia e á mocidade de 3 a 17 anos, que invita a crear ilustracións cunha mensaxe en galego.

Fonte: Xuventude

Os Premios Manuel Beiras recoñecen este ano as empresas A Grileira, Aqueladas e Nós Televisión polo seu labor exemplar en favor do galego no comercio, na produción audiovisual e na comunicación dixital. A gala salientou a demanda social de galego en Santiago e o papel das empresas como motor de prestixio lingüístico. A iniciativa, promovida polo Concello e a Cámara de Comercio, busca reforzar o uso do idioma no ámbito socioeconómico e destacar proxectos que o converten nun valor engadido.

Fonte: Concello de Santiago de Compostela

A Deputación da Coruña reforza o seu apoio ao galego mediante dous convenios coa Mesa pola Normalización Lingüística e con Correlingua, cun investimento total de 60 000 euros. A colaboración garante a continuidade de «A liña do galego», servizo clave para protexer os dereitos lingüísticos e promover avances no uso social do idioma. Ademais, apoia o Correlingua, iniciativa educativa e reivindicativa que mobiliza a mocidade na defensa do galego e impulsa actividades ao longo do curso. Ambos os proxectos contribúen a prestixiar a lingua e fortalecer o compromiso colectivo coa súa recuperación social.

Fonte: Deputación da Coruña

O Boletín Oficial da Provincia da Coruña publica as bases do programa de axudas a empresas audiovisuais para o apoio á distribución, a comercialización e a exhibición audiovisual en lingua galega durante o ano 2026.

Fonte: Consello da Cultura Galega

O secretario xeral da Lingua, Valentín García, clausurou no colexio Froebel, en Pontevedra, a segunda edición do programa de dinamización lingüística Falamos +, no que participaron dez centros de educación infantil e primaria repartidos polas catro provincias co obxectivo, apuntou, “de aproveitar os centros escolares como espazos de socialización en idades temperás para impulsar o uso do galego máis alá das aulas, tamén nas actividades de lecer”.

Fonte: O Portal da Lingua Galega