Galicia
A Xunta e Agadea convocan o V Premio de Literatura Infantil ‘Simbad para o Recordo e o Alzhéimer’
O secretario xeral da Lingua, Valentín García, participou na presentación da V edición do Premio de Literatura Infantil Simbad para o Recordo e o Alzhéimer. Trátase dunha iniciativa impulsada pola Asociación Galega de Axuda aos Enfermos con Demencia Tipo Alzhéimer que conta co apoio da Xunta de Galicia, co obxectivo de sensibilizar sobre esta doenza entre a cativada e establecer vínculos a través da literatura entre as distintas xeracións.
Fonte: O Portal da Lingua Galega
A Deputación de Pontevedra convoca dúas liñas de subvencións para impulsar o uso do galego
A Deputación de Pontevedra aprobou un programa de axudas por 300.000 euros para promover o uso do galego na Administración local e na creación cultural. Por unha banda, destínase 200.000 € a apoiar a posta en marcha, mantemento e reforzo dos servizos de normalización lingüística en concellos pequenos e entidades locais. O resto, 100.000 €, oriéntase a facilitar a edición de publicacións en galego impulsadas por entidades sen ánimo de lucro. A iniciativa procura consolidar o galego como lingua habitual de traballo institucional e contribuír á difusión da cultura e do patrimonio bibliográfico da provincia.
Fonte: Galicia Xa
Valentín García participa en Rianxo na presentación da tradución ao galego do Sanshô-Dôei de Eihei Dōgen
O secretario xeral da Lingua, Valentín García, participou na presentación do libro trilingüe xaponés-francés-galego Sanshô-Dôei. Eihei Dōgen (永平道元). Escolma, no que Eme Cartea verte ao galego trinta wakas do mestre xaponés, con ilustracións de Doroteo Arnáiz.
Fonte: O Portal da Lingua Galega
O programa «Modo Galego, actívao» consolídase grazas ao éxito desta cuarta convocatoria
A cuarta edición de «Modo Galego, actívao!» reúne en Ames uns 2700 escolares e toda a rede de centros públicos para impulsaren o uso do galego no día a día mediante retos lúdicos ligados á contorna. O programa, promovido pola RAG e o Concello, combina investigación e acción para frear a perda de galegofalantes ao entrar no sistema educativo e deseñar medidas avaliables e replicables. A iniciativa implica profesorado, familias e educación non formal, e incorpora tamén ámbitos de socialización como comedores e escolas deportivas. Nesta convocatoria inclúese a participación no Proxecto Nós para doaren voces en galego e reforzaren a presenza da lingua no mundo dixital.
Fonte: Real Academia Galega
Valentín García acompaña a Antón Costa na presentación da obra «Johán Vicente Viqueira López. Un esclarecido e singular humanista galego»
O secretario xeral da Lingua, Valentín García, acompañou o profesor e investigador Antón Costa Rico na presentación da obra Johán Vicente Viqueira López. Un esclarecido e singular humanista galego, editada polo Centro Ramón Piñeiro para a Investigación en Humanidades (CRPIH) no marco da Colección Olladas no Pasado.
Fonte: O Portal da Lingua Galega
O Dicionario da Real Academia Galega pecha o ano 2025 con case 32 millóns de consultas
O Dicionario da Real Academia Galega pechou 2025 con case 32 millóns de consultas, o que confirma o seu peso como ferramenta dixital de referencia. A RAG salienta o crecemento sostido na última década e a actualización constante dunha obra con máis de 56 000 entradas. Entre os recursos máis usados tamén figuran as guías de nomes e de apelidos galegos, con centos de miles de procuras. A institución ampliou a oferta con novas ferramentas, como o buscador de nomes galegos das aves, e mantivo unha web con contidos divulgativos e publicacións descargables.
Fonte: Real Academia Galega
A Xunta apoia un documental de difusión do legado de Otero Pedrayo na conmemoración do 50 aniversario do seu pasamento
O conselleiro de Educación Ciencia, Universidades e FP, Román Rodríguez, acompañado polo secretario xeral de Universidades, José Alberto Díez, e polo secretario xeral da Lingua, Valentín García, participou na presentación dun documental sobre a figura de Otero Pedrayo no marco dos actos conmemorativos do 50 aniversario do seu pasamento e do Ano Oteriano impulsados pola fundación do escritor de Trasalba e que contan co apoio da Xunta de Galicia.
Fonte: O Portal da Lingua Galega
A Universidade de Santiago crea un kit de terminoloxía óptica
O Servizo de Normalización Lingüística da USC e a Comisión de Normalización da Facultade de Óptica crearon un kit dixital para promover a terminoloxía da óptica oftálmica. O paquete inclúe un glosario multilingüe cos termos básicos e unha guía interactiva ilustrada sobre elementos das monturas de anteollos. Tamén recolle as versións oficiais en galego das normas UNE-EN ISO de terminoloxía óptica, con acceso restrinxido aos equipos da USC.
Fonte: Consello da Cultura Galega
O Concello de Santiago publica un vídeo de Verónica Boquete no que mostra o seu compromiso co uso do galego no deporte
O Departamento de Lingua lanzou un novo vídeo da campaña «Ficha polo Galego!», no que Verónica Boquete reivindica a lingua propia como parte da identidade e do deporte. A futbolista subliña a importancia de escoitar referentes falaren galego e fai un chamamento a clubs, deportistas, arbitraxe, familias e afección a empregáreno con naturalidade. A adhesión faise ao cubrir un formulario na web municipal e pode reforzarse ao difundir a mensaxe en redes co cancelo #fichapologalego.
Convócase unha nova edición do IX Concurso de microrrelatos en galego
A Real Academia Galega e PuntoGal convocan a novena edición do Concurso de Microrrelatos, aberto a persoas de todas as idades, co obxectivo de promover a escrita breve e a capacidade de expresar grandes ideas en poucas palabras. Os participantes poden presentar até dous relatos de máximo 200 palabras nas categorías infantil, xuvenil e de adultos. O concurso busca dar visibilidade a escritores noveles e consolidar a escritura en galego.
Fonte: Real Academia Galega
Boletín
Subscríbase ao boletín
