O Goberno español garantirá a continuidade do proxecto de intelixencia artificial en galego desenvolvido pola Universidade de Santiago de Compostela a través do CiTIUS e do Instituto da Lingua Galega, tras os avances acadados co financiamento inicial de 3,4 millóns de euros. Os traballos permitiron crear corpus masivos e modelos lingüísticos abertos que reforzan a presenza do galego na familia pública de IA ALIA. A Secretaría de Estado de Dixitalización defende que esta aposta contribúe a evitar a exclusión dixital da lingua, ao tempo que impulsa tecnoloxías propias e unha industria vinculada ao galego.

Fonte: Código Cero

A Asociación de Medios en Galego, dinahosting e PuntoGal lanzan a campaña «Subscríbete ao galego» para reforzar a presenza da lingua nos medios e no ámbito dixital coincidindo co Día das Letras Galegas e o Día de Internet. Entre o 17 e o 31 de maio, quen se subscriba a algún dos medios participantes recibirá gratuitamente durante un ano un dominio .gal e un servizo de aloxamento web. A iniciativa busca incentivar novas subscricións, apoiar a creación de contidos en galego na rede e fortalecer o ecosistema comunicativo propio.

Fonte: Asociación de Medios en Galego

O secretario xeral da Lingua, Valentín García, acompañou no Instituto Castelao, en Vigo, o alumnado que resultou premiado no Concurso-Exposición Letras Galegas 2026, no que colabora a Xunta de Galicia coa intención, destacou, “de implicar as xeracións máis novas neste tipo de efemérides que celebran a nosa cultura e incentivan a capacidade investigadora e creadora dos escolares”.

Fonte: O Portal da Lingua Galega

A Xunta de Galicia incrementa un 50 % as axudas á edición en lingua galega de recursos didácticos curriculares para niveis non universitarios ao elevar a achega para este ano ata os 300.000 euros. Así se recolle na convocatoria que publica no Diario Oficial de Galicia  a Consellería de Cultura, Lingua e Xuventude para materiais en formato impreso ou dixital.

Fonte: O Portal da Lingua Galega

A Consellería de Cultura, Lingua e Xuventude convocou axudas para que as entidades locais galegas poidan adquirir novidades editoriais en galego e reforzar os fondos das bibliotecas e axencias de lectura municipais integradas na Rede de Bibliotecas Públicas de Galicia. O prazo de solicitude abrirase o 4 de maio permanecerá activo até o 4 de xuño de 2026.

Fonte: Consello da Cultura Galega

O creador galego Leo Espiña Otero presenta As lendas da Galaquia, un videoxogo en galego e inglés que combina arte, mitoloxía galega e estética retro nunha experiencia inspirada na Game Boy orixinal. O xogo, nacido do seu Traballo de Fin de Grao, transforma figuras como o trasno ou a Santa Compaña en mecánicas narrativas. A iniciativa súmase ao movemento emerxente do videoxogo galego e reforza a presenza da lingua propia no lecer dixital.

Fonte: Faro de Vigo

A Deputación de Pontevedra aprobou 200 000 euros en axudas para apoiar os servizos de normalización lingüística de nove concellos da provincia, co obxectivo de reforzar o uso do galego no ámbito local. A maior parte dos fondos destinaranse ao mantemento de servizos xa existentes na Caniza, A Estrada, Moaña, Ponteareas, Redondela, Salceda de Caselas, Valga e Vilagarcía, mentres que Mos recibirá a contía máxima para crear un novo servizo. A institución provincial subliña que estas achegas permitirán financiar gastos de persoal e consolidar o galego como lingua de traballo, comunicación e prestixio nos concellos.

Fonte: Deputación de Pontevedra

O Concello de Castroverde convocou a sexta edición do seu concurso de microrrelatos, dotado con 760 euros en premios e orientado a fomentar a creación literaria en galego. O certame, aberto a persoas maiores de 12 anos, terá como tema “A lareira dos avós” e premiará textos breves, orixinais e inéditos que destaquen pola súa calidade, corrección e capacidade evocadora. As obras poderán presentarse por correo electrónico até o 17 de maio de 2026, baixo un sistema que garante o anonimato das autorías.

Fonte: Lugo Xa

O Carballo Interplay pechou a súa décimo terceira edición consolidado como un espazo de referencia para a creación dixital en formatos breves e en lingua galega, nun contexto no que este tipo de contidos gaña peso estratéxico. A serie canadense T-REX foi distinguida como mellor produción internacional nun palmarés marcado por relatos sobre identidade, xénero e conflitos emocionais contemporáneos. O festival reafirmou tamén o seu apoio ao talento galego, con recoñecementos para Miradenovo e Antontísimo, e co impulso á produción de novos proxectos en lingua galega.

Fonte: Extra Digital

O conselleiro de Cultura, Lingua e Xuventude, José López Campos, salientou que o número de persoas en Galicia que le ocasional ou habitualmente na nosa lingua “medra en case nove puntos ata acadar o 72 %, o que supón que falamos de sete de cada dez galegos”, celebrou. Así o destacou en resposta a unha pregunta no Pleno do Parlamento de Galicia, coincidindo coa véspera do Día do Libro, na que puxo en valor os datos do último Informe de hábitos lectores.

Fonte: O Portal da Lingua Galega