A Deputación da Coruña puxo en marcha a novena edición do Premio Quero Cantar, orientado a promover o uso do galego e a creación musical e poética entre a infancia e a mocidade. O certame diríxese a solistas e grupos de ata 16 anos que presenten cancións orixinais e inéditas nesta lingua, en categorías infantil e xuvenil. As persoas premiadas accederán á gravación profesional dunha maqueta e recibirán material musical e produtos culturais en galego.

Fonte: Consello da Cultura Galega

Bruxas e Dragóns: Baba Iagá, primeiro libroxogo en galego, creado por Ledicia Costas e Luismi Pérez, chegou ás librarías con grande acollida e esgotou axiña a súa estrea editorial. O libro propón unha lectura participativa baseada na elección de camiños narrativos que levan a múltiples desenlaces. Pensado para públicos diversos, combina literatura e xogo como porta de acceso á lectura creativa. O título abre unha triloxía que xa se atopa en desenvolvemento.

Fonte: Praza Pública

O VII Premio Daniel Domínguez de Guión en Galego recoñece este ano Monstros, de Benigno López Moure, unha obra destacada polo uso preciso dos códigos do thriller e pola profundidade ética e psicolóxica da súa proposta. A Asociación Galega de Guionistas reafirma con este galardón o seu compromiso de fortalecer a creación en galego e garantir máis presenza desta lingua no sector audiovisual.

Fonte: Culturagalega

O secretario xeral da Lingua, Valentín García, entregou os premios aos cinco centros escolares das localidades coruñeses da Coruña e Laxe e das lucenses de Cospeito e Castroverde, que resultaron gañadores do Concurso Galego de Vídeos Científicos 2025. O certame está convocado, ao abeiro do Mes da Ciencia en Galego, pola Institución Galega da Ciencia e conta coa colaboración da Xunta de Galicia co obxectivo de promover entre a rapazada a innovación científica en lingua galega.

Fonte: O Portal da Lingua Galega

O Foro Galicia Crea botou a andar como un novo espazo de traballo e debate na Comunidade ao redor da ciencia, a tecnoloxía e a cultura co apoio da Xunta “por fomentar a creatividade e o pensamento libre e crítico na Comunidade”. Así o puxeron en valor o secretario xeral da Lingua, Valentín García, e o director xeral de Cultura, Anxo M. Lorenzo, na presentación desta iniciativa que se pon en marcha cunhas xornadas ao redor das cantigas-galego portuguesas de finais do século XII.

Fonte: O Portal da Lingua Galega

O secretario xeral da Lingua, Valentín García, seguiu o desenvolvemento das probas Celga que, por primeira vez, se puideron realizar en liña e para as que se recibiron máis de 600 solicitudes. Trátase dun avance que, segundo explicou na sede da Axencia Galega para a Modernización Tecnolóxica de Galicia, que nos permite “chegar a máis persoas no obxectivo de validar e acreditar o dominio do galego”, puntualizando que “esta foi unha primeira experiencia que queremos seguir ampliando tendo en conta a gran demanda, tanto aumentando as prazas como os niveis”.

Fonte: O Portal da Lingua Galega

O Programa de promoción do galego nos territorios de Castela e León limítrofes con Galicia consolídase chegando neste curso 2025-2026 ás 1.207 persoas matriculadas, case 30 máis que no curso pasado, afianzando deste xeito o interese pola aprendizaxe da lingua e o compromiso do Goberno autonómico co seu impulso máis alá da propia Comunidade.

Son datos que vén de confirmar a Consellería de Cultura, Lingua e Xuventude tras a reunión da comisión de seguimento do programa, conformada por ambos os dous Gobernos, para analizar e valorar os resultados e abordar as accións dos vindeiros meses.

Fonte: O Portal da Lingua Galega

O secretario xeral da Lingua, Valentín García, visitou a mostra “Cantade todas a unha. O cantigueiro popular galego”, coa que a Xunta de Galicia conmemora as Letras Galegas 2025.

Fonte: O Portal da Lingua Galega

O secretario xeral da Lingua, Valentín García, presentou a tradicional programación de «Nadal en Rede», a campaña de dinamización lingüística que impulsa a Xunta de Galicia e que celebra a súa décimo cuarta edición achegando propostas de lecer en galego, dirixidas á rapazada e público adulto, por preto de medio cento de concellos durante esta época festiva.

Fonte: O Portal da Lingua Galega

O BNG promove unha campaña que procura recuperar a forma galega de nomes e apelidos e reforzar a identidade cultural, ao presentar a galeguización como un compromiso co futuro da lingua. A organización subliña que, tras décadas de impedimentos, hoxe o cambio resulta doado e permitiría devolverlles visibilidade a apelidos practicamente desaparecidos pola castelanización. A iniciativa abrangue asesoramento á cidadanía, implicación da militancia e reivindicación de políticas públicas que garantiren unha xestión áxil destes trámites.

Fonte: Faro de Vigo