O secretario xeral da Lingua, Valentín García, participou no acto de entrada do Arcón da Memoria e o recoñecemento ás persoas e entidades que preservan o patrimonio deste territorio único, que acolleu a Igrexa de Santiago de Rubiás organizado pola Asociación de Amigos e Amigas do Couto Mixto.

Fonte: O Portal da Lingua Galega

O escenario de Atardecer no Gaiás terá esta semana como protagonista absoluto a 9Louro. O rapeiro de Muros actuará o xoves día 9 de xullo no ciclo de concertos gratuítos ao aire libre organizados pola Xunta de Galicia na Cidade da Cultura.

Fonte: O Portal da Lingua Galega

A Xunta apoiará o desenvolvemento de 22 proxectos audiovisuais, entre longametraxes, documentais, curtametraxes, coproducións internacionais e unha serie, co propósito de fortalecer o sector en Galicia. A convocatoria destaca polo protagonismo do galego, xa que a práctica totalidade das obras susceptibles de rodárense nesta lingua contará con versión orixinal galega.

Fonte: Galicia Confidencial

A Deputación de Pontevedra destinará 150.000 euros a 61 entidades sen ánimo de lucro de 28 concellos da provincia para promover iniciativas de dinamización da lingua galega. As axudas permitirán impulsar proxectos relacionados coa toponimia, a creación audiovisual, o uso do galego no ámbito económico e actividades culturais e literarias, co obxectivo de reforzar a presenza social da lingua.

Fonte: Deputación de Pontevedra

A Deputación entregou o XVII Premio Rosalía de Castro de Lingua a Carlos Callón, á CTNL e aos proxectos A Gramola Gominola e Vitamina G polo seu compromiso coa promoción do galego. No acto, a deputada Sol Agra reivindicou o papel das institucións na normalización lingüística e defendeu a necesidade de acompañar a vontade social con políticas públicas, recursos económicos e iniciativas que favorezan o uso da lingua en todos os ámbitos.

Fonte: Deputación da Coruña

Os cursos “Galego sen fronteiras” comezaron en Santiago coa participación de 62 estudantes de dezaoito países de Europa, Asia e América. A iniciativa, impulsada pola Real Academia Galega e o Instituto da Lingua Galega, desenvolverase durante tres semanas na Facultade de Filosofía, onde se promove o intercambio cultural e a difusión internacional da lingua e da cultura galegas.

Fonte: Real Academia Galega

A plataforma presentará en setembro unha Iniciativa Lexislativa Popular para blindar os dereitos lingüísticos e responder á situación de emerxencia do galego. A proposta reclamará derrogar o decreto 79/2010 e garantir o galego como lingua vehicular e de acollida no ensino. Tamén pedirá reforzar a oferta activa na administración, na xustiza e na sanidade, así como introducir cláusulas lingüísticas nos contratos públicos.

Fonte: Queremos Galego

O sector editorial galego edita arredor de 3000 títulos ao ano, dos que seis de cada dez están escritos en galego, segundo os datos manexados pola Consellería de Cultura. A actividade tamén gaña peso económico, cunha facturación de 27,6 millóns de euros, máis da metade procedente de obras publicadas na lingua propia. O bo momento do sector acompáñase dun incremento da lectura en galego, nun contexto no que o Goberno galego prepara novas actuacións dentro do Plan de Dinamización da Lectura.

Fonte: Faro de Vigo

O secretario xeral da Lingua, Valentín García, participou na presentación do festival-xornada de portas abertas na Casa de Rosalía Abride a Fiestra, que organiza a Fundación Rosalía de Castro co apoio da Consellería de Cultura, Lingua e Xuventude o día 12 de xullo. Nel poderase gozar das participacións de De Vacas, Coro da Ra, Federico Pérez Rey, Cé Orquestra Pantasma, Manuel Rivas, Anxos Sumai, Pecha a Cansela, Pepe Barro, DJ Peter Sélek e Icía García, entre outras.

Fonte: O Portal da Lingua Galega

A Fundación Otero Pedrayo e a Asociación de Amigos de Ramón Otero Pedrayo convocan o Premio de Oratoria «Orador do Ano Oteriano 2026 Ramón Otero Pedrayo». O certame, enmarcado nas actividades do Ano Oteriano, premiará pezas gravadas en galego e centradas no pensamento, na obra, na figura ou no legado cultural do autor.

Fonte: Consello da Cultura Galega