O secretario xeral de Política Lingüística, Valentín García, participou na Facultade de Química da Universidade de Santiago de Compostela na entrega do XXXI Rally Matemático sen Fronteiras, impulsado pola Institución Galega de Ciencia, Igaciencia, co apoio da Xunta.

Fonte: O Portal da Lingua Galega

A Xunta de Galicia publica no Diario Oficial de Galicia as datas das probas que permiten obter os certificados acreditativos dos niveis de lingua galega Celga 1, 2, 3 e 4, que terán lugar simultaneamente nas dúas sedes habituais, Santiago de Compostela e Ponferrada (León), entre o 13 de maio e o 3 de xuño.

Fonte: O Portal da Lingua Galega

Segundo as cifras do informe de 2021 (o último publicado), as queixas relativas á vulneración de dereitos lingüísticos presentadas ante a Valedora do Pobo alcanzaron as 261 e referíronse principalmente a deturpacións da toponimia, a incumprimentos na lei ou á exclusión do galego na Administración.

Fonte: Nós Diario

A Mesa pola Normalización Lingüística, a Asociación Galega de Produtoras Independentes e o Grupo de Estudos audiovisuais da Universidade de Santiago denunciaron as dificultades que supón para a normalización do galego a nova lei española do audiovisual.

Fonte: La Vanguardia

A Xunta de Galicia, en colaboración coa Radio Galega, vén de convocar o V Concurso de Podcasts-Radio na biblio, que este ano se centra na figura de Francisco Fernández del Riego. Nesta edición promóvense os traballos enfocados a salientar a valoración da lingua materna, reforzar a lectura en galego ou o achegamento ao mundo da edición e da tradución.

Fonte: Xunta de Galicia

A undécima edición do Galegote Rock, que se celebrará en Pontevedra os días 5 e 6 de maio, contará coa participación de catorce grupos e artistas que fan música en galego.

Fonte: Pontevedra Viva!

Vilagarcía acolleu a presentación da campaña «É túa. Pásaa!», unha iniciativa da plataforma Alingua para promover o uso do galego que inclúe unha webserie, entrevistas, un vídeo musical e diferentes accións de promoción desta lingua.

Fonte: Consello da Cultura Galega

Baixo o título A reflexión sobre a lingua na sociedade: alén dun contido curricular, unha necesidade estratéxica. Propostas para a docencia, esta guía dirixida a docentes de secundaria ten como obxectivo impulsar unha reflexión crítica entre a mocidade respecto da situación social do galego.

Fonte: Universidade de Vigo

A Xunta de Galicia e a Fundación Castelao veñen de ratificar un acordo polo que se cede a esta institución un espazo na Cidade da Cultura para a instalación dunha sede e a realización de actividades culturais e de divulgación ao redor da figura do creador e escritor de Rianxo.

Fonte: O Portal da Lingua Galega

Estes guións que a RAG difunde na rede recollen as colaboracións de Francisco Fernández del Riego no Galician Programme, un espazo dedicado á cultura galega que emitiu a BBC entre 1947 e 1956.

Fonte: Galicia Confidencial