O novo regulamento para as escolas infantís municipais da Coruña, que aínda non está aprobado, inclúe entre os seus obxectivos a difusión da cultura galega e o uso do galego como lingua vehicular, así como o reforzo do ensino do inglés.  

Fonte: La Opinión

Radio Picariña, a canle dixital de música infantil e xuvenil da Radio Galega, alcanzou xa as 1000 cancións en galego no seu catálogo en liña, ao que acaban de incorporarse novos temas de artistas como Fofó, Chuches Amil, Mamá Cabra, João Afonso, Alonso Caxade ou Sara Vidal.

Fonte: Nós Diario

A Asociación de Medios en Galego convoca o seu certame de vídeos, podcasts e regueifas ao que poderán presentarse traballos nos que se relacione a lingua galega e os medios de comunicación. Poden participar no concurso persoas individuais de entre 12 e 30 anos e tamén aulas de ESO, Bacharelato e ciclos formativos.

Fonte: Código Cero

A Real Academia Galega traslada o pleno extraordinario do Día das Letras Galegas dedicado a Ricardo Carballo Calero ao sábado 31 de outubro. Así mesmo, os demais actos presenciais que a institución tiña previstos para conmemorar esta data celebraranse á volta do verán.

Fonte: Real Academia Galega

A Consellería de Política Social ampliou ata as 24 horas ao día, sete días á semana, o servizo de videointerpretación en lingua de signos que ofrece a Federación de Asociacións de Persoas Xordas de Galicia (FAXPG).

Fonte: Xunta de Galicia

Trátase dun estudo do ano 1987 sobre o uso e a actitude da igrexa católica diante do galego no que Xesús Ferro Ruibal fai unha análise sociolingüística sobre a progresiva castelanización desta institución.

Fonte: Consello da Cultura Galega

O Consello da Cultura Galega e a Real Academia Galega puxeron a disposición das persoas interesadas para a súa descarga varias publicacións que se achegan á cultura galega de principios do século XX ou mesmo o XIX.

Fonte: CulturaGalega

Os institutos de secundaria Escolas Proval de Nigrán e Terra de Turonio de Gondomar convocan o I Certame de Micropoemas Beatriz da Serra. Poderase presentar o alumnado de 9 a 20 anos dalgún dos centros educativos do Val Miñor con poemas orixinais e inéditos, de entre dous e oito versos, escritos en lingua galega.

Fonte: ValMiñorTV

O Dicionario en liña da Real Academia Galega alcanzou no mes de marzo o número máis alto de buscas da súa historia ao superar as 113 000 diarias de media. En total rexistráronse 3 503 934 procuras, un 42 % máis que no mes anterior.  

Fonte: Real Academia Galega

O Boletín Oficial do Estado publicou o novo nome oficial da terminal compostelá, que pasará a chamarse Aeroporto de Santiago-Rosalía de Castro, en honra á escritora galega, un cambio impulsado desde o Concello e aprobado posteriormente por unanimidade no Parlamento.

Fonte: Galicia Confidencial