En total son 92 os docentes itinerantes de inglés en toda Galicia que percorren os colexios do rural. Isto débese a que a Xunta de Galicia impulsou este curso o programa de Anticipación da Primeira Lingua Estranxeira en Educación Infantil para que os nenos de tres a seis anos empezasen a familiarizarse co idioma.

Fonte: El País

O 50 % das organizacións non gobernamentais para o desenvolvemento (ONGDs) asentadas en Galicia emprega maioritariamente a lingua galega nas súas actividades. Así se desprende do estudo presentado o pasado xoves 29 de xaneiro pola secretaria xeral de Política Lingüística, Marisol López, e polo secretario xeral de Relacións Exteriores, Julio César Fernández Mato. A investigación foi realizada polo Instituto Galego de Análise e Documentación Internacional (IGADI) en colaboración co profesor da Universidade de Vigo Xesús Domínguez Dono, e contou co financiamento da Secretaría Xeral de Política Lingüística.

Fonte: Xunta de Galicia

A Asociación Galega de Opositores esixe que a Xunta elabore unha nova lista de interinos e substitutos para o presente curso académico na que se teñan en conta os resultados do proceso selectivo de 2008 para o acceso aos corpos docentes, á vez que solicita que se expulse da listaxe as persoas que non acreditaron o coñecemento de galego.

Fonte: La Voz de Galicia

O PP de Galicia apoia explicitamente unha mobilización da agrupación Galicia Bilingüe. Aínda que o 8 de febreiro, día da manifestación en Santiago, Núñez Feijóo estará en campaña en Bos Aires, a número dous do PP por Pontevedra, Corina Porro, afirmou que o secretario xeral dos populares, Alfonso Rueda, asistirá á protesta.

Fonte: El País

Fomentar a creatividade en lingua galega aproveitando as posibilidades que ofrecen as novas tecnoloxías da comunicación é un dos principais obxectivos que persegue a Secretaría Xeral de Política Lingüística co desenvolvemento de diversas iniciativas na rede. O departamento que dirixe Marisol López convida á cidadanía a participar nos concursos, xogos e outras experiencias interactivas que nestes momentos se atopan en marcha en internet. Todas estas iniciativas enmárcanse na campaña En galego, tes todo por vivir. Tócache!, e a web palabrasencadeadas.com aglutina estas propostas participativas de dinamización lingüística.

Fonte: Xunta de Galicia

O tradutor de Google engadiu novos idiomas entre os que se atopa o galego. Desta forma, desde este momento pódese converter textos desde e ata o galego desde outra lista que xa supera os 25 idiomas.

Fonte: Ojo Buscador

O grupo local da Mesa pola Normalización Lingüística en Cedeira advirte dun “serio retroceso” nos usos formais que no ámbito público fai do galego o Concello no que é un dos principais núcleos de poboación da comarca do Ortegal.

Fonte: Xornal.com

A Consellería de Educación e Ordenación Universitaria, en colaboración coa Secretaría Xeral de Política Lingüística, convoca cursos de linguaxe administrativa galega, de nivel medio e superior, que se celebrarán nas escolas oficiais de idiomas da Coruña, Ferrol, Santiago de Compostela, Lugo, Ourense, Pontevedra e Vigo ao longo deste ano. Estes seminarios impartiranse en dúas quendas: a primeira comezará en febreiro/marzo e a segunda en outubro.

Fonte: Xunta de Galicia

A Mesa pola Normalización Lingüística reclamará a intervención do Valedor do Pobo para que o idioma galego deixe de estar excluído da celebración da Semana Santa en Ferrol, ante a falta de compromiso do goberno local, encabezado en minoría polo Partido Socialista de Vicente Irisarri.

Fonte: A Nosa Terra

O Concello de Ponteceso vén de pór en marcha unha campaña para dar a coñecer o seu Servizo de Normalización Lingüística, co que pretende fomentar o uso da lingua galega entre os veciños.

Fonte: La Opinión