O presidente da Real Academia Galega (RAG), Xosé Ramón Barreiro Fernández, avogou por aplicar a Lei de normalización lingüística de Galicia, que considera que non foi executada ata o momento, e por potenciar que os alumnos, que na actualidade teñen maiores competencias en galego, utilicen esta lingua unha vez saen de clase.

Fonte: Xornal.com

A asociación Galicia Bilingüe entregou no Rexistro Xeral da Xunta un total de 102.330 sinaturas recollidas pola agrupación a pé de rúa en apoio ás súas peticións, que pasan polo dereito dos cidadáns a elixir a lingua que utilizan e dos pais a escoller o idioma do ensino dos seus fillos.

Fonte: A Nosa Terra

A partir do traballo de planificación do IES Pedrouro, e partindo dunhas xa elevadas taxas de emprego do noso idioma, o Concello de Burela desenvolveu co apoio de todos os grupos políticos o Modelo Burela de convivencia lingüística. Agora, un documental amósanos a realidade deste lugar.

Fonte: Consello da Cultura Galega

O ENDL do CPI Aurelio M. Rei García de Cuntis vén de lanzar o Planeta de Equipos de Normalización e Dinamización Lingüística, unha páxina que recolle as novidades relacionadas cos ENDL e a lingua.

Fonte: CTNL

A conselleira de Educación sinalou que na Comunidade galega se desenvolven este curso 665 seccións bilingües en 190 centros, o que supón o dobre que o curso pasado.

Fonte: Xunta de Galicia

O Concello de Marín puxo en marcha no último trimestre de 2008 unha campaña de dinamización e normalización lingüística no municipio. Durante o primeiro trimestre de 2009 desenvolverase a segunda parte con accións de formación para os dous ámbitos principais, a administración e o comercio, e con novas accións de dinamización para toda a sociedade marinense.

Fonte: CTNL

Os 257 nenos de tres anos que figuran no padrón de Marín recibirán nos próximos días un exemplar do libro Garbanciño, co obxectivo de motivalos a que lean e falen o galego.

Fonte: La Voz de Galicia

Caixanova organiza por noveno ano consecutivo o Tren Caixanova, unha iniciativa que ten por obxectivo a promoción do uso do galego entre os escolares e a utilización do transporte público ferroviario.

Fonte: Galicia Hoxe

Catorce vilas galegas acollerán a partir de marzo unha nova xeira dos Encontros dos Axóuxeres. Marín, Monforte de Lemos, Allariz, Porto do Son, Ribeira, Boiro, A Illa de Arousa, Cangas, Salvaterra de Miño, Tomiño, Outes, A Estrada, Poio e Teo son os lugares elixidos para a realización destas sesións organizadas pola Secretaría Xeral de Política Lingüística, que teñen como principal obxectivo fomentar a transmisión do galego como lingua de uso habitual na familia.

Fonte: Xunta de Galicia

A Concellería de Mocidade, Solidariedade e Normalización Lingüística do Concello da Coruña convoca o I Torneo de Debate “Torrelingua”, que ten por obxecto difundir o galego entre os mozos e mozas.

Fonte: CTNL