Ante o recurso presentado polo sindicato CIG-Ensino no rexistro xeral da Xunta pedindo a paralización da consulta ás familias sobre o idioma no ensino, a Consellería de Educación e Ordenación Universitaria quere defender a plena legalidade deste proceso que está amparado polos servizos xurídicos da Administración autonómica.

Fonte: Xunta de Galicia

Unha ducia de entidades vencelladas ao mundo do ensino publicaron un manifesto cuestionando a lexitimidade da enquisa sobre o emprego do galego nas aulas promovida pola Xunta.

Fonte: Culturagalega.org

O Consello da Xunta aproba o convenio de colaboración entre a Consellería de Educación e Ordenación Universitaria e a Universidade de Santiago de Compostela (USC) para continuar este ano cun programa de actuacións en materia de investigación lingüística.

Fonte: Xunta de Galicia

Os sindicatos CIG, UXT e CC OO mobilizaranse ante o Parlamento de Galicia o próximo 23 de xuño para esixir que non se modifique o artigo 35 da Lei da función pública e que se manteña a obrigatoriedade de realizar unha ou máis probas das oposicións en galego.

Fonte: Galicia Hoxe

Os formularios para a consulta sobre a lingua no ensino xa están dispoñibles na práctica totalidade dos centros de infantil, primaria, secundaria e formación profesional da comunidade. A repartición concluirá o luns 15 de xuño despois de que nos dous primeiros días os impresos chegasen a máis do 90 % dos 1490 centros que forman parte deste proceso.

Fonte: Xunta de Galicia

O secretario xeral de Política Lingüística, Anxo Lorenzo, participou na celebración en Abadín do centenario do nacemento de Aquilino Iglesia Alvariño. Na súa intervención, Anxo Lorenzo encomiou o traballo realizado polo finado escritor lucense en prol do idioma e a cultura de Galicia. Ademais, o secretario xeral apostou por unha política lingüística que, “sendo diferente das anteriores, estea baseada na promoción activa e multidimensional do galego”.

Fonte: Xunta de Galicia

O sindicato nacionalista CIG presentou dúas denuncias contra a Consellería de Educación co fin de paralizar, aínda que sexa cautelarmente, a realización da consulta aos pais sobre o idioma, galego ou castelán, no que prefiren que estuden os seus fillos.

Fonte: Faro de Vigo

A Secretaría Xeral de Política Lingüística vén de poñer en marcha dous novos recursos na rede. Trátase do espazo www.xogaconfervello.com e mais dunha web desde a que se difunden experiencias dinamizadoras de carácter transversal levadas a cabo polos equipos de normalización e dinamización lingüística (ENDL) dos centros de ensino non universitario.

Fonte: Xunta de Galicia

O presidente da Xunta, Alberto Núñez Feijóo, cualificou de "cordiais" as relacións do Executivo galego coa Real Academia Galega (RAG) e remarcou o seu compromiso de trasladarlle á institución académica o decreto do galego antes da súa aprobación definitiva este ano.

Fonte: Europa Press

A Secretaría Xeral de Política Lingüística sumouse, por primeira vez, ao Voluntariado Lingüístico Galego, en calidade de entidade asociada. O programa, que se desenvolverá o vindeiro curso académico, consiste nun proxecto que promove a Dirección Xeral de Xuventude e Voluntariado, en colaboración coa Universidade de Santiago de Compostela, para fomentar a aprendizaxe da lingua e da cultura galegas entre os estudantes con bolsas Erasmus na comunidade.

Fonte: Xunta de Galicia