O secretario xeral de Política Lingüística, Anxo Lorenzo, realizou a súa primeira visita institucional á Deputación de Ourense, onde foi recibido polo seu presidente, José Luis Baltar. Durante a reunión que mantiveron, Lorenzo e Baltar expresaron o seu interese na posibilidade de establecer unha colaboración entre a Secretaría Xeral de Política Lingüística e a Deputación de Ourense para desenvolver conxuntamente iniciativas que incidan na promoción do uso da lingua galega.

Fonte: Xunta de Galicia

O director xeral de Industria, Enerxía e Minas, Ángel Bernardo Tahoces, apostou por introducir o galego nas empresas como medida para normalizar o uso desta lingua, en resposta a unha pregunta do deputado do Bloque Nacionalista Galego Bieito Lobeira, na que denunciou que existe "un problema obxectivo" no mundo empresarial no que "necesariamente ten que entrar o Goberno".

Fonte: Europa Press

A Consellería de Educación e Ordenación Universitaria, a través da Secretaría Xeral de Política Lingüística, como xa anunciara o secretario xeral Anxo Lorenzo, daralle continuidade á convocatoria de axudas aos centros de ensino para a realización de proxectos que fomenten o uso do galego no ámbito educativo.

Fonte: Xunta de Galicia

O programa da Secretaría Xeral de Política Lingüística Bocaberta achegará o galego aos nenos e nenas de Santiago a través de diferentes obradoiros. Farao a través da campaña Contos para falar, unha iniciativa que o departamento que dirixe Anxo Lorenzo ten en marcha coa editorial Rodeira.

Fonte: Xunta de Galicia

As accións do programa europeo Volangteer comezaron a desenvolverse o 14 de outubro co obxectivo de promover o uso do galego entre as persoas estranxeiras que estudan en Galicia e, desta maneira, aumentar o seu coñecemento da realidade sociocultural galega así como a súa integración, comprensión intercultural e solidariedade.

Fonte: Xunta de Galicia

A Fundación Galicia Empresa vén de incorporar catro novas empresas para normalizar o uso do galego nas súas actividades empresariais así como promover a investigación no sector económico galego sobre todo nos eidos social, económico e cultural.

Fonte: CEG

A Concellería de Normalización Lingüística do Concello de Vigo e Yelmo-Cineplex organizan o programa Unha lección de cine, dirixido a alumnos e alumnas de secundaria, que ten como obxectivo promover o cine en lingua galega.

Fonte: La Voz de Galicia

A Asociación Socio-pedagóxica Galega (AS-PG) organiza, co patrocinio da Concellería de Mocidade, Solidariedade e Normalización Lingüística do Concello da Coruña, a segunda edición de Torrelingua, programa de dinamización lingüística que ten por obxecto promover o galego entre o alumnado de primaria e secundaria.

Fonte: CTNL

Mancomún amplía o Corpus coa tradución dun software de virtualización feita en colaboración coa Oficina de Software Libre da Universidade de Santiago de Compostela e un aplicativo de xestión de desenvolvemento de proxectos informáticos ou informatizados. Ademais tamén se incorpora o Glosario de localización publicado hai uns meses por Mancomún.

Fonte: Mancomún

Logo do seu percorrido polas cidades galegas durante o mes de setembro, as Festas dos Axóuxeres –un programa de dinamización da lingua galega da Secretaría Xeral de Política Lingüística dirixido aos bebés e ás súas familias– regresan de novo nun formato máis reducido. Trátase dos Encontros dos Axóuxeres que, a diferenza das festas, se celebran en espazos pechados –centros socioculturais, casas do concello, etc.– e para un público máis reducido, estimado en arredor de 70 persoas en cada sesión.

Fonte: Xunta de Galicia