Un bo número de artistas do Perú está a adoptar a lingua quechua nas súas cancións e isto convértese nun xeito de loitar contra a súa relegación na sociedade peruana.

Fonte: El País

Organismos en prol dos dereitos humanos informaron de que Irán condenou unha profesora kurda, Zahra Mohammadi, de 28 anos de idade, a dez anos de cárcere. Segundo estes grupos, a sentenza baséase exclusivamente na súa actividade de promoción da lingua kurda.

Fonte: Nationalia

A Rede Europea para a Igualdade das Linguas (ELEN, polas súas siglas en inglés) trasladou ao Consello dos Dereitos Humanos da ONU as súas críticas ás recentes resolucións da xustiza española en contra das linguas minorizadas. A ELEN está integrada por entidades das linguas minorizadas do Estado español como a Mesa pola Normalización Lingüística.

Fonte: ELEN

Un proxecto de colaboración entre as universidades suízas de Xenebra e Zürich permitiu o nacemento da revista en liña Língua-lugar, que xorde co fin de divulgar a identidade portuguesa no país helvético.

Fonte: Jornal de Notícias

Un encontro da Rede de Ensino Portugués no Estranxeiro (EPE, polas súas siglas en portugués) terá lugar na Fundación Calouste Gulbenkian de Lisboa para compartir estratexias sobre o ensino do portugués no novo contexto causado pola emerxencia sanitaria.

Fonte: Público

O Parlamento de Noruega ratificou a proposta presentada polo Goberno para ampliar os requisitos de dominio da lingua norueguesa para poder optar á nacionalidade.

Fonte: News in English

Bedwyr Ab Ion Thomas, estudante da Universidade de Cardiff, creou un pequeno dicionario de neoloxismos médicos en galés co que espera facer unha contribución ao ámbito científico en lingua galesa.

Fonte: BBC

A corporación Inuit TV Network ofrecerá contidos televisivos no norte do Canadá nas diferentes variedades das linguas inuit. Esta iniciativa permitirá manter a unión cultural e lingüística entre as diferentes zonas do pobo inuit.

Fonte: Rcinet

Acaba de entrar en vigor en Letonia a polémica medida aprobada previamente no parlamento que obriga as emisoras locais de televisión a reducir drasticamente as súas emisións en lingua rusa.

Fonte: La Vanguardia

A senadora Silvina García Larraburu presentou un proxecto de lei no Congreso da Nación Arxentina para que se oficialicen todas as linguas dos pobos indíxenas do país.

Fonte: Anbariloche