Os promotores deste traballo intelectual esperan xerar interese e preocupación tanto dos especialistas como dos propios falantes e educadores, co fin de encontrar os camiños axeitados que permitan contribuír ao mantemento e á vitalidade das linguas indíxenas.

Fonte: CONADI

Os europarlamentarios votaron a favor dunha resolución sobre os dereitos fundamentais. O informe da resolución, elaborado por Giusto Catania (GUE/NGL), establece novos estándares nun amplo abano de dereitos fundamentais e contén varias cláusulas a favor das linguas menos usadas e das minorías nacionais.

Fonte: Eurolang

Nos dez anos do mirandés como segunda lingua oficial de Portugal, os estudosos desta lingua alertan de que, malia non estar en perigo, o mirandés está ameazado pola modernización, polo que é importante crear mecanismos para a súa manutención.

Fonte: Jornal de Notícias

Un informe elaborado polo investigador Rhys Evans para o Goberno escocés conclúe que existe un gran "potencial de crecemento" para a lingua propia das terras baixas de Escocia, o escocés, e que o executivo debe tomar medidas para incrementar o uso do idioma.

Fonte: Món divers

Un director rexional de La Poste afirma que os apóstrofos da lingua bretoa equivocan os lectores ópticos que usa a empresa, mentres que as institucións bretoas lle piden respecto polo idioma céltico e lle lembran que os ordenadores "se adaptan a todas as linguas".

Fonte: Nationalia

Co propósito de preservar e fortalecer a lingua zapoteca, na rexión da Sierra Juárez lévase a cabo un programa de rescate e difusión co apoio de profesores bilingües e no cal se involucra a persoas de diferentes xeracións, informou o deputado local pola zona, Adrián Méndez Cruz. Sinalou que nesa parte do estado de Oaxaca se falan catro variantes do zapoteco e o que se pretende é rescatar a forma orixinal desta lingua, que co paso do tempo se foi deformando.

Fonte: NSS Oaxaca

A enciclopedia en internet máis consultada do mundo, Wikipedia, xa posúe a versión en idioma guaraní na súa extensa lista de 264 idiomas dispoñibles, revelou o pasado xoves 29 de xaneiro a axencia informativa IPP do Goberno paraguaio.

Fonte: Terra

O ministro de Cultura portugués, que cumpre un ano de mandato, quere que o Acordo Ortográfico sexa aplicado "o máis tardar o 1 de xaneiro de 2010 a nivel oficial e en todos os medios de comunicación". Nunha entrevista á axencia Lusa, Pinto Ribeiro reafirmou a importancia do Acordo Ortográfico para a estratexia que o seu ministerio pretende desenvolver.

Fonte: RTP

Estase impulsando unha campaña para conseguir un dominio de alto nivel para a comunidade lingüística e cultural córnica, nun intento por emular os éxitos obtidos noutras campañas que se están levando a cabo na actualidade no Reino Unido.

Fonte: Eurolang

Os provedores de gas, electricidade e auga poderían estar obrigados por lei a ofrecer os seus servizos en galés de acordo cun proxecto de lei publicado polo Goberno da Asemblea de Gales o 2 de febreiro.

Fonte: The Independent