A Universidade da Madeira (UMa) e a Dirección Rexional das Comunidades e Cooperación Externa (DRCCE) de Portugal lanzaron dous cursos en liña de lingua portuguesa destinados a lusodescendenes e migrantes para fortalecer os lazos culturais coa diáspora e apoiar a integración da comunidade estranxeira na Rexión Autónoma de Madeira.

 Fonte: JM de Madeira 

Unha nova plataforma chamada DarllenCo ofrécelle á cativada unha ferramenta para aprender a ler en galés e a pronunciar axeitadamente as palabras, mesmo cando as súas familias non dominan o idioma. Reúne xa máis de 52 000 persoas usuarias en Gales e no resto do mundo e conta co apoio dun fondo do Goberno galés para o desenvolvemento de tecnoloxías na lingua do país.

Fonte: Llywodraeth Cymru / Welsh Governement

O Río de Xaneiro converteuse na Capital Mundial do Libro durante un ano, nunha cerimonia que se celebrou no Teatro Carlos Gomes. A UNESCO fixo pública a designación en 2023, polo que a cidade carioca pasa a ser a primeira de lingua portuguesa en recibir tal distinción.

Fonte: Vermelho

O Ministerio de Ensino Superior de Alxeria decretou que, a partir do curso 2025‑26, as carreiras científicas e médicas se impartan integramente en inglés, primeiro paso para converter este idioma na lingua vehicular de toda a universidade. A iniciativa rompe co predominio histórico do francés e busca impulsar a proxección internacional do sistema educativo.

Fonte: University World News

A Universidade de Stanford presentou un programa multidisciplinar que apoiará comunidades de falantes minoritarios na dixitalización, creación de contidos e desenvolvemento de ferramentas de IA nos seus idiomas. O proxecto prevé elaborar corpus textuais, recursos educativos abertos e modelos de tradución automática, abrindo así novas posibilidades de presenza en liña para linguas con escasa pegada dixital.

Fonte: Standford University

O descoñecemento do inglés entre a poboación brasileira residente en Portugal está a limitar o acceso a empregos máis cualificados e mellor remunerados, o que frea tamén a súa integración plena no mercado laboral portugués.

Fonte: Público

O Concello de L'Alguer abriu unha nova convocatoria para obter o certificado de nivel C1 de catalán, co obxectivo de fomentar o uso e coñecemento da lingua catalá na cidade sarda. Esta iniciativa forma parte dos esforzos locais por preservar e revitalizar o patrimonio lingüístico catalán presente na rexión.

Fonte: Diari de la Llengua

Con motivo do Día Mundial da Lingua Portuguesa, que se celebra o 5 de maio, o podcast da ONU News inicia unha serie de entrevistas con representantes de países lusófonos e estudantes do idioma.

Fonte: Bom dia

Cincuenta activistas da lingua irlandesa participaron nun desafío de natación en varios puntos de toda Irlanda, para mostrar solidariedade co pobo palestino. A iniciativa, organizada por Conradh na Gaeilge, busca combinar o apoio á causa palestina coa promoción da lingua irlandesa.

Fonte: VIEWdigital

A Universidade de Yale ampliou o seu programa de Estudo Independente Dirixido (DILS) para incluír linguas indíxenas en perigo de extinción, como o calmuco ou o maorí. Este programa permite ao alumnado estudar linguas non ofrecidas nos cursos regulares e moitas veces reconectar coas súas orixes familiares promovendo a preservación e revitalización das linguas minoritarias. Con todo, a pesar da importancia cultural e educativa desta iniciativa, a universidade non outorga créditos académicos por estes estudos, o que supón un paradoxo que xerou críticas entre parte do estudantado.

Fonte: Yale News