A decisión do presidente dos Estados Unidos de declarar o inglés como lingua oficial dificulta o acceso a servizos esenciais para millóns de estranxeiros. Sen a obrigatoriedade de traducións ou asistencia noutras linguas, moitos migrantes atopan barreiras para xestionar trámites básicos.

Fonte: El País

A Secretaría de Cultura, Artes e os Patrimonios dos Pobos de Honduras (SECAPPH, polas súas siglas en español) está a impulsar iniciativas para preservar a gran riqueza lingüística deste país centroamericano.

Fonte: Hondudiario

En Francia, a lexislación actual prohibe o uso de caracteres propios das linguas rexionais nos nomes propios, o que afecta comunidades como a bretoa, occitana e catalá. Un grupo de deputadas e deputados solicita agora unha reforma legal para que os falantes doutras linguas rexionais francesas non vexan vulnerados os seus dereitos lingüísticos e culturais.

Fonte: Diari de la Llengua

Co obxectivo de mellorar as oportunidades laborais para a mocidade do estado indio de Assam, a Universidade de Dibrugarh anunciou a introdución dun curso de lingua xaponesa a partir do próximo ano académico.

Fonte: The Times of India

A cidade de Nova York incorporou o Losar, o aninovo tibetano, á súa lista oficial de festivos, recoñecendo así a crecente vitalidade da comunidade tibetana desde os anos 90. Ademais, a creación dunha páxina de Facebook en tibetano pola Oficina de Asuntos de Inmigrantes reforza o compromiso coa preservación e promoción desta cultura nos Estados Unidos.

Fonte: International Campaign for Tibet

O primeiro ministro de Albania, Edi Rama, e a ministra de Educación e Deportes, Ogerta Manastirliu, anunciaron en Atenas o lanzamento dun programa de apoio financeiro para os primeiros 50 profesores de lingua albanesa en Grecia, co propósito de preservar a lingua e facilitar a integración das novas xeracións da diáspora albanesa.

Fonte: A2 News

O xefe de estado de Cabo Verde presentou oficialmente a tradución da Constitución á lingua materna, o crioulo, co obxectivo de achegar o texto fundamental á poboación e promover a identidade cultural do país.

Fonte: Observador

Unha investigación realizada en Ghana demostrou que os nenos e nenas que medran en contornas multilingües teñen a capacidade de adquirir até seis linguas diferentes desde os primeiros meses de vida. O estudo subliña a importancia do contexto social e da exposición constante a diferentes linguas para facilitar esta aprendizaxe.

Fonte: Fanpage

O papel da educación e os procesos de urbanización en África están a impulsar o uso do portugués en países como Angola e Mozambique, o que contribúe a consolidar o seu status como lingua global.

Fonte: Público

O príncipe Guillermo de Gales compartiu unha mensaxe en galés para conmemorar o Día de San David, patrón do País de Gales.

Fonte: Sky News