Un total de 64 estudantes de 18 nacionalidades participará en Braga nos cursos de lingua portuguesa para estranxeiros da Universidade do Miño. A crecente participación demostra a importancia que está a adquirir o portugués a nivel internacional.

Fonte: Diário do Minho

A comunidade de falantes de español dos EUA criticou a administración de Donal Trump por descoidar e abandonar o uso da lingua española nas comunicacións oficiais e en redes sociais como Twitter.

Fonte: The Guardian

Unha enquisa realizada polo British Council revelou que existe unha forte preocupación entre o profesorado do País de Gales polo futuro do ensino das linguas modernas no sistema educativo. O estudo mostrou, por exemplo, que o 61 % das escolas teñen menos de cinco alumnos estudando unha lingua estranxeira no último ano do bacharelato.

Fonte: BBC

O conselleiro de Cultura, Educación e Ordenación Universitaria, Román Rodríguez, presentou o Plan anual de formación do profesorado para o curso 2017/18 que, ao igual que o anterior, seguirase estruturando en base ao Marco de competencias profesionais docentes. Ademais, introduce unha serie de novidades vinculadas aos novos programas educativos ata 2020.

Fonte: Xunta de Galicia

O Goberno do País de Gales está estudando reforzar as medidas de protección e promoción da lingua galesa co obxectivo de acadar o millón de falantes en 2050. Ao abeiro destas medidas, as empresas privadas poderían estar obrigadas a ofrecer servizos en galés.

Fonte: BBC

A Cámara Federal do Brasil aprobou un proxecto de lei que garante a contratación de intérpretes de lingua brasileira de signos nos órganos dependentes da administración pública.

Fonte: Felipe Vieira

O Concello de Wrexham, no País de Gales, está realizando un estudo do uso do galés nas empresas locais co obxectivo de poder ofrecer formación e asesoramiento sobre o uso desta lingua.

Fonte: Wrexham

A Oficina de Formación de Persoal de Nivel Superior (CAPES, polas súas siglas en portugués) do Ministerio de Educación do Brasil ofrece un programa que ten como obxectivo a capacitación profesional de profesores de lingua inglesa nos EUA.

Fonte: 24 horas News

O número de interesados en aprender portugués en Australia aumentou nos últimos tempos. Actualmente, un total de 650 persoas están a estudar portugués, declarou o secretario de Estado das Comunidades Portuguesas, José Luís Carneiro.

Fonte: Sol

O Festival Internacional das Artes de Lingua Portuguesa (Festlip), que reúne anualmente artistas dos países de lingua portuguesa no Río de Janeiro, pode ser cancelado este ano por falta de patrocinio, informou a súa organizadora, Tânia Pires.

Fonte: CM ao Minuto