Navarra
O Nafarroa Oinez reivindica o dereito a aprender e vivir en éuscaro en toda Navarra
Miles de persoas participaron no Nafarroa Oinez, organizado conxuntamente polas ikastolas Erentzun e San Fermín. As entidades promotoras reivindicaron o dereito a aprender e vivir en éuscaro en toda Navarra e reclamaron superar as limitacións territoriais ao seu uso. A xornada destacou a responsabilidade compartida de institucións e sociedade na normalización lingüística.
Fonte: EFE
Navarra reúne 1100 estudantes nun programa para fomentar o uso do éuscaro nas tecnoloxías dixitais
A décima edición de Sarean euskaraz reúne en Navarra 1100 estudantes de cuarto da ESO procedentes de 19 centros educativos. A iniciativa, impulsada por Euskarabidea, pretende fomentar o uso do éuscaro nas tecnoloxías da información e na cultura dixital. O programa combina obradoiros, conferencias e actividades lúdicas relacionadas cos videoxogos, a robótica, a intelixencia artificial e a creación de contidos dixitais nesta lingua.
Fonte: Gobierno de Navarra
Unha exposición na Universidade Pública de Navarra mostra a realidade lingüística dos Pireneos
A Universidade Pública de Navarra acolle a exposición Pirinioetako hizkuntzak, que achega á cidadanía a diversidade lingüística dos Pireneos a través do aragonés, catalán, occitano e éuscaro. A mostra enmárcase no convenio de colaboración entre a UPNA e Euskaltzaindia, que inclúe tamén accións de investigación, formación e promoción do éuscaro. O acordo busca reforzar a normalización da lingua vasca e a cooperación entre ambas institucións.
O Parlamento navarro insta a implantar nos centros educativos carteis bilingües en éuscaro e castelán
O Parlamento de Navarra aprobou instar o Departamento de Educación a implantar sinalización e carteis bilingües en castelán e éuscaro nos centros educativos públicos da comunidade. A medida dará prioridade aos colexios nos que se emprega o éuscaro nos modelos lingüísticos A, B e D, tanto na sinalización física como dixital.
Fonte: Magisnet
O Concello de Pamplona organiza unha consulta para recibir achegas á creación do regulamento do Consello Municipal do Éuscaro
O Concello de Pamplona abriu unha consulta pública previa á creación do Regulamento Orgánico do Consello Municipal do Éuscaro, co fin de incorporar achegas da cidadanía e das entidades interesadas. O órgano, previsto no primeiro Plan de Normalización Lingüística municipal (2027-2031), terá funcións consultivas, de asesoramento e seguimento das políticas lingüísticas. A súa creación busca reforzar os dereitos lingüísticos e favorecer unha maior presenza e prestixio social do éuscaro na cidade.
Fonte: Iruñeko Udala
Preséntase en Navarra unha nova edición da campaña «Euskera ahora»
O Goberno de Navarra renovou a campaña «Euskera ahora» para impulsar a aprendizaxe do éuscaro entre a poboación adulta, que no último curso reuniu preto de 5800 persoas. Como principal novidade, a matrícula nos niveis A1 e A2 será gratuíta, mentres que o resto contará con axudas de ata 475 euros. A iniciativa, que tamén promove a formación en liña, busca ampliar o número de falantes e facilitar o acceso á lingua tanto á poboación local como á chegada recentemente a Navarra.
Fonte: Gobierno de Navarra
Ábrese a matrícula para o ensino de éuscaro a persoas adultas en Zubiarte
O Departamento de Educación de Navarra abriu ata o 10 de setembro un novo prazo de matrícula para os cursos de éuscaro para persoas adultas do euskaltegi público Zubiarte de Uharte. A oferta abrangue todos os niveis, modalidades presenciais, en liña e de autoaprendizaxe, con horarios adaptados tamén ás quendas laborais. Como novidade, incorporaranse grupos sénior, ademais de grupos de conversa nos niveis B2 e C1.
Fonte: Gobierno de Navarra
O Goberno de Navarra e Eusko Ikaskuntza asinan un convenio para abordar cuestións relacionadas coa transmisión e o futuro do éuscaro
O Goberno de Navarra e Eusko Ikaskuntza renovaron o seu acordo de colaboración, dotado con 60.000 euros, para promoveren o éuscaro como elemento cultural e de convivencia. O convenio financiará a segunda fase dun estudo sobre a relación da poboación migrante e local coa lingua e coa cultura navarra, mediante dúas enquisas complementarias. Os resultados permitirán identificar barreiras, expectativas e oportunidades de participación, ademais de orientar futuras políticas públicas e iniciativas comunitarias de integración.
Fonte: Euskarabidea
O Concello de Pamplona convoca un ano máis o seu certame literario en éuscaro
O Concello de Pamplona convocou a 36.ª edición do Certame Literario en Éuscaro para autoría novel, con modalidades de poesía e narrativa. Poderán participar persoas nacidas ou residentes en Navarra con obras inéditas e de temática libre, que deberán presentar antes do 26 de outubro. A convocatoria, dotada con 9000 euros, establece tres premios por categoría e varias mencións.
Fonte: Iruñeko Udala
A Universidade Pública de Navarra contará cun título propio en planificación lingüística para a promoción do éuscaro
A Universidade Pública de Navarra incorporará no curso 2026-2027 un título propio de experto en planificación lingüística para a revitalización e a promoción social do éuscaro, financiado polo Goberno navarro. A formación, impartida integramente en éuscaro e en modalidade en liña, busca preparar persoal cualificado para deseñar, xestionar e avaliar políticas lingüísticas en contextos plurilingües. O programa abordará sociolingüística, normativa, xestión institucional e promoción do éuscaro nos ámbitos socioeconómico e non formal.
Boletín
Subscríbase ao boletín
