O concurso de relato oral "Tíralle da lingua", dirixido ao alumnado e ao profesorado dos distintos niveis educativos, ten como obxectivo promover e normalizar o uso oral do galego. Os participantes poderán contar nesta lingua historias de base popular, de base literaria ou de creación propia.

Fonte: Consello da Cultura Galega

O secretario xeral de Política Lingüística, Valentín García, acompañou a profesora, investigadora e escritora Beatriz G. Turnes no acto de presentación do libro Esta noite hei de ir a verte, a terceira novela destinada ao público xuvenil que dá ao prelo a autora compostelá baixo o selo Costa Oeste da Editorial Galaxia.

Fonte: O Portal da Lingua Galega

O Pazo de San Roque acolleu a entrega de premios da X edición de Lingua de Namorar, o concurso en liña de mensaxes de amor que busca dinamizar o uso da lingua galega entre a mocidade nas súas relacións persoais e nas tecnoloxías da información e da comunicación.

Fonte: O Portal da Lingua Galega

O vídeo vencedor da novena edición do certame ‘Explícoche matemáticas 2.0’, que organiza a Universidade de Santiago, foi titulado A primeira programadora, dedicado á figura da matemática Ada Lovelace. Esta iniciativa ten como obxectivo fomentar o uso do galego como medio de transmisión das matemáticas e estimular a creatividade do alumnado cos medios audiovisuais.

Fonte: Universidade de Santiago de Compostela

A Consellería de Cultura, Educación e Universidade publicou as resolucións das axudas para o curso escolar 2020/2021 destinadas aos proxectos de fomento do galego realizados nos centros de ensino non universitario de titularidade privada.

Fonte: Consello da Cultura Galega

A asociación Docentes de Português na Galiza (DPG) lanzou o vídeo "Amor à primeira vista" como parte da campaña para animar o alumnado de ESO e bacharelato a que se inscriba na materia de portugués. Nel expóñense as vantaxes de aprendizaxe que teñen os galegofalantes pola proximidade entre esa lingua e o galego.

Fonte: Consello da Cultura Galega

Carlos Cerecedo, alumno da Universidade de Vigo, creou a web "Somos Cultura", que ten como obxectivo darlle resposta á escasa utilización do galego entre a mocidade, xuntando nun só punto ligazóns a contidos en galego de diferentes plataformas e redes sociais.

Fonte: Treintayseis

A Consellería de Cultura, Educación e Universidade convoca axudas dirixidas a empresas do sector editorial para a edición en galego de recursos didácticos curriculares para o ensino non universitario.

Fonte: Consello da Cultura Galega

A Xunta de Galicia convoca 10 prazas de profesorado-lector de lingua, literatura e cultura galegas no exterior. O Diario Oficial de Galicia vén de publicar a convocatoria pública de prazas nos lectorados de lingua, literatura e cultura galegas para o 2021 en centros universitarios de España, Italia, Francia, Brasil, Croacia, Alemaña e Reino Unido.

Fonte: O Portal da Lingua Galega

A Consellería de Cultura, Educación e Universidade, representada no seu secretario xeral de Política Lingüística, Valentín García, participou no acto de entrega de premios do Rally Científico Matemático 2020 e 2021, iniciativa promovida pola Igaciencia (Institución Galega de Ciencia) coa colaboración da Xunta de Galicia, por medio da Secretaría Xeral de Política Lingüística.

Fonte: O Portal da Lingua Galega