Cataluña
Preséntase o Plan de traballo 2009-2010 para o fomento do catalán na avogacía
Presentouse en Tarragona o Plan de traballo 2009-2010 para fomentar o catalán no sector da avogacía. Esta iniciativa enmárcase no acordo asinado entre os departamentos de Vicepresidencia, Xustiza e o Consello de Colexios de Avogados de Cataluña (CICAC) para o fomento do uso do catalán neste ámbito.
Fonte: Generalitat de Catalunya
O catalán só se usa nun de cada catro xuízos
Só o 25 % dos xuízos que se celebran en Cataluña se fan en lingua catalá. Este é un dos datos incluídos nun estudo elaborado pola administración lingüística e xudicial da Generalitat de Catalunya, que por primeira vez retrata os hábitos lingüísticos nos tribunais e xulgados cataláns.
Fonte: Avui
A Secretaría de Política Lingüística e o Idescat presentan os datos da Enquisa de usos lingüísticos da poboación 2008
O secretario catalán de Política Lingüística, Bernat Joan, e o subdirector de Produción Estatística do Idescat (Instituto de Estatística de Cataluña), Enric Ripoll, presentaron os datos da Enquisa de usos lingüísticos da poboación 2008. Esta é a segunda edición dunha estatística oficial incluída na lei do Plan estatístico 2006-2009.
Fonte: Generalitat de Catalunya
O ministro de Xustiza admite que cómpre estimular o catalán nos xulgados
O ministro de Xustiza, Francisco Caamaño, admitiu a necesidade "de seguir impulsando e estimulando" nos xulgados o uso do catalán e o resto de linguas que no seu territorio comparten cooficialidade co castelán.
Fonte: Avui
Os servizos lingüísticos das universidades catalás elaboran un estudo sobre usos, actitudes e identidades lingüísticas
O estudo "Usos, actitudes e identidades lingüísticas entre o estudantado universitario" foi elaborado durante o curso 2008-2009 polos servizos lingüísticos das universidades catalás e, por primeira vez, mostra datos globais do sistema universitario catalán.
Fonte: Universitat de Barcelona
A Generalitat de Catalunya e 14 concellos poñen en marcha cursos de verán para ensinar catalán a nenos estranxeiros
A Generalitat de Catalunya e 14 concellos puxeron en marcha un plan piloto para ensinarlles catalán a nenos e nenas de orixe estranxeira que o precisen para garantir a súa incorporación ao sistema educativo e á sociedade. As clases formarán parte da oferta de verán de entidades como os centros municipais e incluirán actividades de lecer.
Fonte: Generalitat de Catalunya
O Goberno catalán aproba o proxecto de lei da lingua de signos catalá
O Goberno catalán aprobou o proxecto de lei da lingua de signos catalá que regulará o ensino, a aprendizaxe e a súa interpretación co fin de garantir o seu uso entre o colectivo de persoas xordas que queira utilizala.
Fonte: Europa Press
Un milleiro de persoas reivindica no Val de Arán o uso do aranés
'Aran per sa lengua' (Arán pola súa lingua), a carreira popular organizada polo colectivo de Lenga Viua, reuniu a un milleiro de persoas para percorrer os lugares do Val de Arán e reivindicar así o uso social da lingua aranesa.
Fonte: La Vanguardia
O catalán é a décimo cuarta lingua máis usada en Google Books
Despois de dous anos e medio do acordo entre Google e a Biblioteca de Cataluña, dixitalizáronse 35.000 libros do máximo centro bibliográfico catalán. Segundo Luis Collado, responsable de Google na península ibérica, o catalán xa é agora o décimo cuarto idioma máis usado en Google Books.
Fonte: Avui
O Colexio de Periodistas de Cataluña pídelle a RTVE que non suprima o informativo vespertino en catalán
O decano do Colexio de Periodistas de Cataluña (CPC), Josep Carles Rius, envioulle unha carta ao presidente de Radio Televisión Española (RTVE), Luís Fernández, para pedirlle que non se suprima a desconexión de 20 minutos en catalán do informativo vespertino durante o mes de agosto por vacacións do persoal técnico.
Fonte: El Debat
Boletín
Subscríbase ao boletín
