A editorial Ara Llibres abriu a convocatoria dun novo premio literario para obras de non ficción en catalán, co gallo da celebración do vixésimo aniversario do seu nacemento. O obxectivo é xerar contidos sólidos e de calidade literaria que se convertan en referentes do xénero e cheguen a un público numeroso.

Fonte: Publishnews

A campaña Totjoc, á que se adheriron 17 establecementos, pon a disposición da poboación unha páxina web con máis de 1000 xogos en catalán, acompañados dunha información detallada das súas características.

Fonte: CPNL

A palabra birra foi escollida, co 32,6 % dos votos, como neoloxismo do ano 2022 tras unha votación impulsada polo Instituto de Estudos Cataláns e a Universidade Pompeu Fabra, na que quedou en segundo lugar salut mental, co 19,6 %.

Fonte: Última Hora

O proxecto Araina ten como obxectivo crear o primeiro corpus de voz en aranés a partir da participación colectiva, para o cal se organizou un acto de oito horas de gravación no que un centenar de persoas leu unhas 4000 frases nesta lingua.

Fonte: Generalitat de Catalunya

A sesión de traballo serviu para acordar a coordinación das políticas de dobraxe e subtitulación ao catalán e a creación dun grupo de traballo para mellorar o sistema de homologacións de títulos de catalán procedentes do ensino regrado, así como analizar a situación desta lingua no mundo dixital, entre outros temas. 

Fonte: Generalitat de Catalunya

O Instituto de Estudos Cataláns (IEC) presentou o Nomenclátor mundial, unha obra que contén 8500 nomes de lugar de máis de 200 países, en concreto, os topónimos máis coñecidos e de uso máis habitual procedentes dun corpus de aproximadamente 7000 formas.  

Fonte: Generalitat de Catalunya

O Departamento de Cultura, no seu esforzo por fomentar a produción audiovisual en catalán, publicou a resolución de concesión das axudas á produción de cinco series de ficción, ás que destinará unha partida de 1,5 millóns de euros respectivamente.

Fonte: Generalitat de Catalunya

Co obxectivo de amosar a escasa presenza do catalán nos videoxogos nace SAGA, un salón no que cincuenta expositores dan coñecer a oferta existente nesta lingua, así como creadores de contidos, asociacións de usuarios e centros de formación.

Fonte: La Vanguardia

A Corporación Catalá de Medios Audiovisuais (CCMA) presentou o seu novo Plan estratéxico co que pretende aumentar o consumo audiovisual en catalán, así como asegurar o acceso universal a contidos de calidade nesta lingua.

Fonte: Crónica Global

A situación do catalán é unha prioridade para o Goberno de Cataluña polo que quere impulsar unha nova política lingüística que asegure o seu futuro, así como o do aranés e o da lingua de signos catalá. Para iso, iniciou un proceso de traballo cuxo resultado é unha listaxe de 100 medidas de carácter transversal para fomentar o catalán en todos os ámbitos.

Fonte: Generalitat de Catalunya