Cataluña
A Generalitat de Cataluña realizaralle unha enquisa ao alumnado sobre o uso das linguas nos centros educativos
A enquisa, dirixida ao alumnado de 6º de Primaria, 4º de ESO, 2º de Bacharelato e 2º de ciclos formativos de grao medio e superior, inclúe preguntas sobre o uso das linguas catalá e castelá no centro educativo, dentro e fóra da aula.
Fonte: Magisterio
Publícanse por primeira vez materiais para a autoaprendizaxe de lingua de signos catalá
As primeiras cápsulas interactivas para iniciarse na aprendizaxe de lingua de signos catalá acaban de ser publicadas. Nestas doce cápsulas trátanse temas como as fábulas, os sentidos e a xeografía, presentados nunha plataforma aberta e gratuíta.
Fonte: Generalitat de Catalunya
A Generalitat de Cataluña publica a última unidade de «Fils de conversa», un recurso para promover a conversa en catalán
«Fils de conversa» é un recurso dixital que ten como obxectivo promover a conversa en catalán de forma lúdica. Con esta nova unidade xa están dispoñibles máis de 300 actividades para estimular a expresión oral a través de vídeos, audios e imaxes.
Fonte: Generalitat de Catalunya
O Goberno de Cataluña aproba a creación dun órgano para reforzar o papel do catalán como lingua vehicular no ensino
O Consello Lingüístico Asesor, presidido pola profesora Carme Junyent, será o novo órgano que velará polo reforzo do papel do catalán como idioma vehicular no ensino e que se encargará de definir as estratexias necesarias para impulsar esta lingua nos centros educativos de Cataluña.
Fonte: 20minutos
Ponse en marcha en Valls unha campaña de fomento do uso do catalán no comercio local
O Concello de Valls organizou unha iniciativa para animar os comerciantes do municipio a que utilicen sempre o catalán no momento de iniciar unha conversa coa clientela e que se manteñan falando esta lingua.
Fonte: Diari Més
Preséntase un dicionario de termos en catalán da COVID-19 con equivalencias en nove linguas, entre elas o galego
A Fundación Dr. Antoni Esteve e o TERMCAT presentan o Diccionari multilingüe de la COVID-19: Cinc-cents termes per a entendre la pandemia, unha obra lexicográfica que inclúe 500 termos relacionados coa COVID-19, coa definición en catalán e os equivalentes en nove linguas: galego, occitano, éuscaro, castelán, inglés, francés, portugués (variantes de Portugal e do Brasil), neerlandés e árabe.
Fonte: Generalitat de Catalunya
Ponse en marcha un concurso de memes sobre a lingua catalá
O servizo Optimot celebra 14 anos cun concurso de memes que se deben publicar entre o 23 de febreiro e o 2 de marzo relacionados con calquera tema de lingua (vocabulario, gramática, literatura, tradución, terminoloxía etc.).
Fonte: Generalitat de Catalunya
Comeza o proceso participativo do Pacto Nacional pola Lingua para fomentar o uso do catalán en diferentes ámbitos e frear a perda de falantes
Durante a primeira reunión do Pacto Nacional pola Lingua, o Goberno de Cataluña presentou un informe sobre a situación do catalán e serviu de punto de partida para iniciar un proceso participativo que servirá como base do futuro plan de política lingüística.
Fonte: El Periódico
Ponse en marcha unha campaña para animar a poboación a participar na construción dun corpus lingüístico para que a tecnoloxía fale catalán
O Goberno de Cataluña organiza, ao abeiro do proxecto Aina, a campaña “La nostra llengua és la teva veu”, que ten como obxectivo a construción dun gran corpus lingüístico do catalán para incorporar a calquera iniciativa dixital. Para iso pide a colaboración cidadá, xa que cómpre obter múltiples formas de falar en catalán en diferentes tons, por persoas de distintas idades e sexos.
Fonte: La Vanguardia
Òmnium Cultural e a Cámara de Barcelona asinan un acordo para impulsar o catalán no ámbito empresarial
Òmnium Cultural e a Cámara de Comercio de Barcelona asinaron un convenio de colaboración no que se comprometen a fomentar o uso do catalán no ámbito empresarial e entre o tecido produtivo.
Fonte: El Nacional
Boletín
Subscríbase ao boletín
