Cataluña
Institucións e entidades catalás e andorranas únense para impulsar o uso do catalán na xustiza
Un total de 18 institucións e entidades catalás e andorranas asinaron un convenio para impulsar o uso do catalán na xustiza mediante a creación de Compendium.cat, un portal de recursos de linguaxe xurídica nesta lingua aberto a todos os profesionais que traballan neste ámbito e á cidadanía en xeral.
Fonte: Generalitat de Catalunya
O Termcat publica un novo dicionario en liña sobre seguridade alimentaria
Este novo dicionario recolle arredor de 500 termos relacionados coa alimentación, a cadea alimentaria, os sistemas de control, os aditivos, os estudos de dieta etc. Cada entrada inclúe a denominación en catalán e as equivalencias en castelán, francés e inglés, así como unha definición e unhas notas explicativas con información adicional.
Fonte: Generalitat de Catalunya
A versión en liña do dicionario do Instituto de Estudos Cataláns incorpora 100 novos termos, moitos vinculados coa pandemia de covid-19
O Instituto de Estudos Cataláns incorporou neste ano 2021 á versión dixital do seu dicionario cen palabras e modificou outras 239. O ámbito da saúde é un dos que máis novidades achega a causa da pandemia, aínda que non é o único.
Fonte: La Vanguardia
O Tribunal Supremo avala que se imparta un 25 % das clases en castelán nos centros educativos de Cataluña
O alto tribunal rexeita o recurso de casación presentado pola Generalitat contra unha sentenza que obrigaba a garantir que o castelán fose a lingua vehicular de, como mínimo, o 25 % das materias.
Fonte: El País
A Universidade de Barcelona organiza por primeira vez un curso de aranés
O primeiro curso de aranés impartido pola Universidade de Barcelona completou as 25 prazas que ofertaba para o nivel A1. A intención é ir ampliando progresivamente a oferta de cursos desta lingua ata chegar ao nivel C2 do MCER.
Fonte: Generalitat de Catalunya
A revista 3Dnassos recibe o Premio Lingua Nacional por mellorar a presenza do catalán no sector dos videoxogos
A revista de videoxogos 3Dnassos resultou o proxecto vencedor do Premio Lingua Nacional deste ano, unha edición á que se presentaron catorce candidaturas de iniciativas que contribúen a estender o uso do catalán.
Fonte: Generalitat de Catalunya
A asociación ENGINY-era recibe o Premio E-TECH 2021 á mellor xestión en lingua e comunicación nas TIC
A asociación ENGINY-era recibiu de mans do secretario de Política Lingüística o Premio á mellor xestión en lingua e comunicación por un proxecto de fomento do talento e a coeducación en formato virtual.
Fonte: Generalitat de Catalunya
Anúncianse os gañadores dos XIX Premios Nacionais Joan Coromines 2021 que recoñecen o compromiso coa lingua e a cultura catalás
A Coordinadora de Asociacións da Lingua Catalá anunciou os cinco gañadores destes premios que recoñecen persoas, entidades ou empresas que destacan polo seu compromiso coa lingua e a cultura catalás.
Fonte: Generalitat de Catalunya
Crean un selo editorial dedicado en exclusiva ao cómic adulto en catalán
A Editorial Finestres nace co obxectivo de encher un baleiro no mundo do cómic en catalán para adultos. Publicará novela gráfica e cómic de autor, un total de dez títulos ao ano, dos que un 80 % serán novidades internacionais e o resto, recuperacións de títulos interesantes para ofrecer nesta lingua.
Fonte: Time Out
O Termcat publica a norma de servizos de tradución en catalán
O Centro de Terminoloxía Termcat elaborou a versión en catalán da UNE-EN ISO 17100:2015, a norma internacional de calidade específica para servizos de tradución que ten como finalidade estandarizar e simplificar a relación entre a clientela e o provedor destes servizos.
Fonte: Generalitat de Catalunya
Boletín
Subscríbase ao boletín
