Cataluña
Ponse en marcha un novo programa de promoción do xogo en catalán
O Consorcio para a Normalización Lingüística impulsa Totjoc, un programa de promoción do xogo en catalán, co que pretende facer máis visibles os seus obxectivos: fomentar o uso desta lingua a través de actividades lúdicas, dar a coñecer a oferta de xogos e xoguetes en catalán e colaborar coas empresas que o incorporan aos seus produtos.
Fonte: Generalitat de Catalunya
O ruso e o ucraíno súmanse ás linguas do vocabulario básico de acollida para as persoas que acaban de chegar a Cataluña editado pola Generalitat
O libro Viure a Catalunya. Vocabulari en imatges incorpora por primeira vez o ruso e o ucraíno, que se suman ao catalán, castelán, francés, inglés, italiano, alemán, árabe e chinés. Trátase dun vocabulario básico en imaxes que contén máis de 1000 palabras en catalán asociadas a unha ilustración e agrupadas por temas.
Fonte: Generalitat de Catalunya
Os principais grupos políticos cataláns chegan a un acordo sobre o uso das linguas oficiais no ensino
PSC, ERC, Junts per Catalunya e En Comú Podem chegaron a un acordo sobre o uso do catalán e o castelán no sistema educativo, para darlle resposta á sentenza que obriga a que este último se use como lingua vehicular, polo menos, nun 25% das horas.
Fonte: El País
A Generalitat de Cataluña abre dúas liñas de axuda á dobraxe e o subtitulado ao catalán
Estas dúas liñas de axuda teñen como obxectivo aumentar a oferta de contidos audiovisuais en catalán: unha para estreas en sala, dirixida a empresas distribuidoras; e outra para dobraxe e subtítulos en catalán de longametraxes e series para plataformas dixitais e en soporte físico, destinada a empresas distribuidoras e estudios de dobraxe.
Fonte: Generalitat de Catalunya
A Fundación Carulla reparte 40 000 euros entre 30 escolas pola súa aposta pola arte, a cultura e a lingua catalá como ferramentas de cambio
Un total de trinta centros educativos recibirá da Fundación Carulla 40 000 euros pola súa compoñente transformadora e por apostar pola arte, a cultura e o catalán como ferramentas de cambio.
Fonte: La Vanguardia
O novo decreto que prepara a Generalitat exclúe fixar porcentaxes de catalán e castelán nas escolas
A sentenza do Tribunal Superior de Xustiza de Cataluña obriga a impartir un 25% de clases en castelán, polo que, para conseguir o consenso dentro do Goberno, unha fórmula pode ser un decreto lei no que non se especifiquen porcentaxes nin proporcións no ensino e uso das dúas linguas.
Fonte: La Vanguardia
Pizza Hut e Telepizza inclúen o catalán na súa web e na aplicación móbil
Pizza Hut e Teleppiza incorporarán o catalán á súa web e aplicación móbil, froito do traballo que está levando a cabo a Generalitat para conseguir ampliar o número de restaurantes que usa esta lingua, ao abeiro do programa Emmarca’t.
Fonte: Generalitat de Catalunya
Establecementos comerciais de Esparreguera súmanse a unha campaña para promover a atención en catalán á clientela
Un total de 160 comercios de Esparreguera acaba de sumarse a un programa polo que se comprometen a garantir a atención en catalán á súa clientela, grazas ao que lucirán un adhesivo verde na fachada do negocio.
Fonte: El LLobregat
Publícase un novo dicionario aranés-catalán
O novo dicionario aranés-catalán é obra de Jusèp Loís Sans Socasau e conta con máis de 30 000 entradas. Esta obra completa o proxecto lexicográfico bilingüe entre ambas as linguas que suma así preto de 70 000 entradas.
Fonte: Generalitat de Catalunya
O FC Barcelona e Òmnium Cultural asinan un acordo para promover o uso do catalán
Os presidentes do FC Barcelona e Òmnium Cultural asinaron un acordo de colaboración para os vindeiros catro anos polo que ambas as entidades se comprometen a traballar conxuntamente na promoción da lingua e a cultura catalás.
Fonte: El Periódico
Boletín
Subscríbase ao boletín
