A entidade Plataforma pola Lingua denunciou o Goberno da Generalitat valenciana no seu último InformeCAT sobre o vigor da lingua catalá. No estudo, culpan o presidente Fabra de pechar Radiotelevisión Valenciana e a súa canle Canal 9, co que "se apagan as dúas últimas canles de televisión en valenciano”, dise no documento.

Fonte: Diálogo Libre

O Consello Valenciano de Cultura aprobou unha «Declaración sobre a lingua dos valenciano e o seu ensino» na que reclama asegurar que a lingua propia «teña presenza en todo o proceso educativo e accesibilidade universal». O documento en favor do ensino en valenciano defende que «a escola é a mellor e máis estable plataforma para a súa aprendizaxe e divulgación, xunto á familia».

Fonte: Levante-emv

O colectivo Maestrat Viu entregou os galardóns da I edición dos Premios Maestrat Viu, que teñen como obxectivo recoñecer o esforzo das persoas, entidades e institucións que traballan pola lingua e o territorio e axudan a promover e divulgar a cultura en valenciano, tanto no ámbito cultural, social, cívico como científico.

Fonte: Levante-emv

Compromís presentou unha proposición non de lei á Mesa das Cortes Valencianas pola que lle demanda á Cámara que inste o Goberno central a pór en marcha exames de valenciano para os axentes da Guarda Civil e a Policía Nacional que prestan servizo na Comunidade, porque consideran que vulneran os dereitos dos falantes de valenciano.

Fonte: Las Provincias

A Rede Europea para a Igualdade das Linguas (ELEN) aprobou a Declaración de Valencia, no marco do encontro que mantiveron en Valencia as organizacións que integran esta rede, entre as que se atopa a Mesa pola Normalización Lingüística. Na declaración apélase á construción dunha Unión Europea respectuosa co multilingüismo onde os diferentes pobos poidan exercer o dereito de vivir nos seus idiomas e culturas propios.

Fonte: Consello da Cultura

Celebrouse o 750 aniversario da implantación do valenciano como lingua oficial nos tribunais de xustiza do antigo Reino de Valencia, por mandamento do rei Jaume I, tal e como lembrou o profesor de Historia do Dereito e das Institucións da Universidade Jaume I, Vicent García Edo.

Fonte: Levante-emv

O pleno da Academia Valenciana da Lingua (AVL) aprobou unha nova declaración institucional centrada na “necesidade duns medios públicos de comunicación en valenciano”, a propósito do “incumprimento da Carta Europea das Linguas Rexionais e Minoritarias, sobre todo tras a desaparición da Radiotelevisión Valenciana (RTVV)”.

Fonte: El Mundo

A Consellería de Educación daralles autonomía aos centros da Comunidade Valenciana para que escollan en que lingua impartir as materias de Ciencias Naturais e Sociais, nas que se desdobra, como consecuencia da aplicación da Lei orgánica de mellora da calidade educativa (Lomce), a materia de Coñecemento do Medio, que se daba ata agora en valenciano.

Fonte: La Vanguardia

A Academia Valenciana da Lingua (AVL) destacou, durante a primeira xornada sobre lingua e cultura popular valencianas, a necesidade de incorporar na educación primaria contidos centrados nas tradicións, a literatura, o patrimonio e as festas populares da Comunidade.

Fonte: Las Provincias

Sen medios de comunicación de titularidade pública en valenciano, advirte a Academia Valenciana da Lingua, o “moi precario” equilibrio entre os dous idiomas oficiais pode acelerarse de forma “irreversible”, e causar “danos graves para a recuperación e vixencia do valenciano como unha lingua absolutamente normal para toda clase de usos sociais”.

Fonte: El País