Navarra
O Goberno de Navarra recorta un 88 % a partida para programas de éuscaro en seis anos
A partida orzamentaria destinada ao desenvolvemento do ensino do éuscaro en Navarra vai en caída libre. O recorte que sufriron estes programas nos últimos seis anos ascende a un 88 %, dos 639 389 euros aprobado en 2009 aos 78 200 euros que recolle o anteproxecto de orzamentos presentado polo Goberno foral.
Fonte: Noticias de Navarra
O Concello navarro de Egüés asina un convenio para promover o éuscaro
O Concello do val de Egüés asinou o convenio con Mintzakide, formado en 2004 para promover a aprendizaxe do éuscaro con grupos de conversa entre estudantes do idioma e persoas que o teñen como lingua materna.
Fonte: Diario de Navarra
Anulan a valoración do éuscaro nun concurso oposición da Universidade Pública de Navarra
A Sala do Contencioso-Administrativo do Tribunal Superior de Xustiza de Navarra estimou un recurso presentado por UXT contra un concurso oposición promovido pola UPNA, que foi anulado no relativo á valoración do mérito de coñecemento do éuscaro.
Fonte: Diario de Navarra
O Parlamento de Navarra tramita a proposta para estender o ensino en éuscaro á zona non vascófona
O pleno do Parlamento de Navarra aprobou a toma en consideración da proposición de lei presentada polo PSN, Esquerda-Exkerra e Geroa Bai para modificar a Lei do éuscaro co fin de atender o ensino nesta lingua tamén na zona non vascófona en función da demanda.
Fonte: El Diario
A conmemoración do Día do Éuscaro pasou practicamente desapercibida en Navarra
No marco das celebracións do Día de Navarra, Día Internacional das Persoas con Discapacidade, día de San Francisco Xabier, chama a atención a escasa, por non dicir ningunha, relevancia que tivo o Día Internacional do Éuscaro. A excepción dun par de citas case testemuñais (unha organizada pola Fundación Orreaga e outra por Nabarralde) a conmemoración pasou desapercibida en Navarra, non así na Comunidade Autónoma Vasca.
Fonte: Noticias de Navarra
O Departamento navarro de Saúde implanta un sistema de videointerpretación da lingua de signos
O Departamento de Saúde do Goberno de Navarra vai implantar no Hospital Reina Sofía de Tudela un sistema de videointerpretación da lingua de signos co fin de favorecer a accesibilidade á información e á comunicación das persoas xordas e favorecer a igualdade de oportunidades deste colectivo no acceso á saúde.
Fonte: La Información
Centos de persoas reclaman en Tafalla a oficialidade do éuscaro
En vésperas do 28º aniversario da Lei do éuscaro, centenares de persoas reivindicaron en Tafalla o dereito a estudar e vivir en éuscaro. A choiva non impediu que multitude de familias se botasen á rúa baixo o lema Muros mais altos caeron. Polo dereito a estudar en éuscaro, para esixir a fin da zonificación.
Fonte: Noticias de Navarra
O colectivo navarro Errigora vende cestas de produtos locais a favor do éuscaro
Cos obxectivos de promover a euscaldunización do sur navarro e a de facilitar o consumo de produtos locais e impulsar a súa produción naceu o ano pasado a campaña de inverno de Errigora, que consiste na distribución e venda de cestas cheas de artigos gastronómicos da zona. Preto do 25 % da recadación destinarase á melloría da situación do éuscaro no sur de Navarra.
Fonte: Noticias de Navarra
Concédenlles axudas a 10 entidades de Pamplona en 2014 para actividades en éuscaro
O Concello de Pamplona concedeu axudas en 2014 a dez entidades da cidade para a realización e programación de actividades culturais e artísticas en éuscaro dirixidas tanto ao público adulto como ao infantil.
Fonte: Diario de Navarra
A poboación bilingüe, que fala e entende éuscaro, aumenta en todas as zonas de Navarra
O conselleiro de Educación do Goberno de Navarra, José Iribas, puxo de manifesto que “o incremento da poboación bilingüe (castelán-éuscaro) é unha realidade, sobre todo nas idades novas”, pero que “se constata que hai un escaso reflexo no uso do éuscaro en casa”.
Fonte: Noticias de Navarra
Boletín
Subscríbase ao boletín
