Garantir o dereito dos cidadáns a que poidan escoller o idioma oficial que desexen na súa relación coa Administración e construír un bilingüismo sostible e equilibrado. Estes son os obxectivos que se marcou o Goberno vasco á hora de desenvolver o quinto Plan xeral de normalización do uso do éuscaro, que terá unha vixencia de cinco anos.

Fonte: Deia

O Departamento vasco de Educación, Política Lingüística e Cultura destinará 814 200 euros á realización de proxectos destinados a promover e consolidar o uso do éuscaro en ámbitos non formais, en especial os que se desenvolven no tempo de lecer.

Fonte: El Diario

Os novos condutores da empresa municipal Dbus deberán acreditar que saben atender os viaxeiros en éuscaro, polo que o exame de acceso terá unha parte en lingua vasca e outra, en castelán.

Fonte: Noticias de Gipuzkoa

O Concello de Eibar porá en marcha unha nova edición do programa Berriketan, co que se quere brindar á cidadanía a oportunidade de coñecer os distintos países de orixe das persoas participantes no programa e, á súa vez, dar a oportunidade á persoa emigrada de coñecer os costumes, anécdotas e feitos históricos de Eibar, mentres se practica o idioma (castelán ou éuscaro) dunha forma lúdica.

Fonte: Diario Vasco

Os mozos Mikel Arribillaga García e Garbiñe Guedejo Ezenarro recibirán un premio de 400 euros da Mancomunidade de Buruntzaldea por realizar en éuscaro o carné de conducir. Os premios inclúense dentro do programa 'Gidabaimena Euskaraz' no que participan 10 autoescolas da comarca e 135 alumnos.

Fonte: Diario Vasco

Os móbiles e as tablets convertéronse nunha das plataformas de ocio preferidas pola mocidade vasca. Porén, a maioría das aplicacións só están en inglés ou castelán. Ante a falta de aplicacións en éuscaro, a compañía Virtualware desenvolveu cinco videoxogos para promover e difundir o uso do idioma entre o público infantil e xuvenil.

Fonte: Diario Vasco

O Concello donostiarra emprendeu unha campaña dirixida aos seus traballadores para animalos a que a súa primeira palabra cos cidadáns sexa en éuscaro. Na actualidade o 73 % dos 1397 empregados municipais (incluídos os de organismos autónomos) son euscaldúns e o Goberno municipal espera seguir ampliando esa porcentaxe.

Fonte: Noticias de Gipúzkoa

Aquelas persoas que queiran mellorar o seu éuscaro oral falando, ou as que queiran dedicar algo de tempo a charlar con estes para axudalos a soltarse, teñen a ocasión de participar no programa Berbetan que organiza Eta Kitto Euskara Elkartea. O obxectivo desta iniciativa é «ofrecerlles ás persoas que queiran mellorar a súa capacidade de falar en éuscaro, un lugar onde facelo de forma informal e nun ambiente distendido», sinalan desde a organización.

Fonte: Diario Vasco

A Facultade de Dereito ampliará a súa oferta académica en éuscaro ao implantar materias neste idioma no dobre grao de Administración e Dirección de Empresas + Dereito do campus de Bilbao. A implementación realizarase a partir do curso 2014-2015, no primeiro curso e irase estendendo progresivamente aos cursos seguintes. O obxectivo é converterse en referencia na educación en éuscaro.

Fonte: Noticias Press

O éuscaro fíxose forte en Bilbao. Euscaldúns ou case euscaldúns, actualmente máis da metade dos bilbaínos son capaces de desenvolverse nesta lingua. Un panorama radicalmente diferente ao de hai tres décadas, cando apenas un de cada cinco veciños da capital biscaíña podía enfiar tres palabras seguidas en éuscaro.

Fonte: Deia